“An bhfuil tú beo leat i ndiaidh na Nollag?” arsa Fiachna le Diarmaid agus é ag foscailt dhoras na hoifige.

“Ann ach é, a mhic,” arsa Diarmaid agus lean sé Fiachna isteach agus shuigh sé síos os comhair a ríomhaire

. “Bhuel, an dtug Santaí a dhath deas chugat?” arsa Fiachna.

“Fan go bhfeice tú seo,” arsa Diarmaid agus tharraing sé gléas úr gleoite as a phóca.

“Guthán póca úr?” arsa Fiachna.

“Guthán póca! Níl ansin ach a leath. Glacann sé grianghrafanna, tá mé ar WAP, tá MP3 air, agus córas NAV,” arsa Diarmaid.

“A Thiarna,” arsa Fiachna. “An itheann sé do chuid duit fosta?”

Leis sin, tháinig beirt de chuid ban na hoifige isteach. “Bliain Úr mhaith,” a dúirt siad araon.

“Go mbé daoibh,” arsa na fir.

“Chím go bhfuair na fir breagáin úra,” arsa Aoife le hAingeal.

“Coinneoidh sin ag dul iad,” arsa Aingeal.

Thug Aoife faoi deara gur chuir sin cineál puis ar Dhiarmaid.

“Ó, tá Diarmaid ag éirí leanbaí,” ar sise, ach rinne sí aithreachas ansin agus chuaigh sí anonn chuige.

“Cad é a fuair tú féin, a Dhiarmaid?” arsa Aoife agus thosaigh Diarmaid ar an an liodán céanna a bhí aige le Fiachna.

Tháinig ceo ar chuid súl Aoife agus dúirt sí gan spriolladh: “Chím. Nach méanar duit.”

Go hádhúil, tháinig Aonghus isteach agus bhí Aoife in ann éalú ó Dhiarmaid. Bhí Aonghus cinéal mall mar ba dhual dó agus ní raibh an dea-chuma air.

“A Aonghuis, cad é mar a chuir tú isteach an Nollaig? Caithfidh sé gur stróic tú an tóin glan as. Tá tú mar a bheadh fear ann a bhfuil a sheal ar shéala a bheith caite.”

Thóg Aonghus a aghaidh tláithbhuí agus bhí a chuid súl sáite thiar ina cheann. Ní raibh ann labhairt ach rinne sé iarracht de gháire beag agus chlaon sé a cheann mar fhreagra.

Shíl corrdhuine gur dóigh ghiorraisc a bhí ag Aonghus ach níorbh ea - bhí sé i gcónaí cineál coigilteach lena chuid focal.

Thuig Aoife gurbh fhearr gan a bheith ag ceastóireacht air agus thiontaigh sí ar Aingeal, nach bhfaca sí ó bhí roimh an Nollaig ann. Bhí Aingeal ina suí siar go sómasach agus aoibh an gháire uirthi. B’fhacthas d’Aoife go raibh sí cinéal buí fosta.

“Tá an chuma air go raibh Daidí na Nollag go maith duitse,” arsa Aoife.

“Bhí,” arsa Aingeal.

“An raibh tú ar shiúl amuigh udaí áit inteacht?” a d’fhiafraigh Aoife.

“Barbados,” arsa Aingeal.

“Níl mé chomh somheallta sin,” arsa Aoife, ach leis sin bheir an ghrian ar sheoda an fháinne a bhí ar lámh chlé Aingil. Thuig Aoife ar an toirt gur gealladh í. Rinneadh dearmad den Nollaig agus bhí an t-aer ramhar ag cuid “comhghairdeas” na foirne.

Tá Róise Ní Bhaoill agus Gordon McCoy ag obair le hIontaobhas ULTACH i mBéal Feirste.