‘Cia hé an fear baileach binnbhriathrach úd ar a bhfuil an folt cas ciardhubh agus an dá ghruaidh chorcra chomhdhearga ar láimh chlí Oisín mhic Fhinn?’ a deir Gráinne. Tógann sí a guthán amach as póca a gúna, cuireann Tinder ar siúl agus athraíonn na socruithe: Fir laistigh d’aon mhíle amháin achair. Svaidhpeálann sí trí dhraidgháirí na bhfear uilig go dtí go dtagann sí ar an ngealgháire atá uaithi agus an t-eolas a ghabhann leis:

Diarmaid, 25.
Achar: Níos gaire ná míle amháin uait.
Comhchairde: Oisín. Oscar. Caílte.
Suimeanna: Fiach. Comhrac. Overheard in Dublin.

Tugann sí sracfhéachaint ar grianghraf=the small amount of photos">an nglac ="gloss" title="a photo">grianghraf atá ann de, é ar an trá i mBinn Éadair agus ag ól ag Teamhair. Thar cinn! Brúnn sí ar an gcroí. LIKE glas ar an scáileán. Soicind feithimh, meandar faitís. Soicind eile. Agus ansin an díomá. Ní fheiceann sí an scáileán a raibh sí ag súil leis. Ní fhaca seisean a próifíl nó chonaic agus níor bhrúigh sé ar an gcroí di. Beidh uirthi tabhairt faoin athchleas. Is cuid den stair an chuid eile den fhinscéal.

Ní dhéanfadh Tinder mórán maitheasa do Ghráinne, dá mbeadh an áis sin aici agus í ar an saol, ach tá sé ag cabhrú le hÉireannaigh na linne seo beocht a instealladh sa saol rómánsúil acu féin. Tá an tindreáil ag athrú sean-nós na geandála nó an tochmhairc in Éirinn.

Ortha na Seiceála, Seachas na Seirce

Crios iompair súisí atá san áis, a chuireann duine i ndiaidh dhuine os comhair an úsáideora – fir amháin, mná amháin nó fir agus mná, de réir do shocruithe gnéasachta – agus a thugann rogha don úsaideoir – caithfimid focal eile a roghnú in amanna mar seo! - an duine a fheiceann siad a mharcáil le croí nó le crois.

Croí: tá spéis agam sa phróifíl seo.
Cros: cuir uaim í.

Má bhrúnn tú ar an gcroí do dhuine atá tar éis brú ar an gcroí duitse, déanfar ‘cleamhnas’ agus tabharfar deis don bheirt agaibh comhrá a thosnú. B’fhéidir go bhfaighfeá ‘súisteoir’ ceart as an gcleas, sin nó slat do bhuailte féin!

Cinnte tá deacrachtaí faoi leith ag baint leis seo. Chun teacht chomh fada le comhrá fiúntach beidh ort treabhadh tríd na daoine gáifeacha ar fad nach bhfuil suim acu in aon duine seachas iontu féin, ach a mbíonn a méaracha greamaithe do chnaip an chroí ionas go mbeidh a fhios acu cé a bhronn croí orthusan. Agus páirtí comhrá aimsithe agat beidh ort snámh tríd an mionchaint uilig agus i ndiaidh cúpla lá de chomhráite beidh tú bréan de na haileonna is na haon chraiceanna ar fad.

Ach is fiú cloí leis. Mar is i measc dhream na gáifeachta agus na bpleotaí a thiocfaidh tú ar an bplúr agus is eachtraíocht a bheas sa gheandáil leis an duine sin. Ag fanacht ag an Túr Solais ar Shráid Uí Chonaill le duine nár chuala do ghuth fós, a thógfaidh ar fánaíocht tú trí áiteanna nach bhfuil aon chur amach agat orthu go fóill, a chuirfidh daoine nua in aithne duit, agus a roinnfidh, más go maith a réitíonn sibh, an saol leat.

Leigheas Galar Súl

Táthar ann a deir nárbh fhéidir lena leithéid de chaidreamh fás ó shíol a chuirtear chomh éadomhain agus a chuirtear le Tinder: níl ach cuma fhisiciúil an duine tábhachtach ar an áis. Anois... Ní ar a phearsantacht a bhí Gráinne ag féachaint agus í ag iarraidh Diarmaid a mhealladh ach ar a fholt dubh agus ar a chraiceann. Agus cé chomh minic is a tharlaíonn sé go mbuaileann tú le strabhsachán ar an bhfíorshaol, go labhraíonn tú leis nó léi ar feadh tamaill agus ansin go gceapann tú gur mhaith leat an chuid eile de do shaol a chaitheamh leis an strabhsachán céanna? Ní tharlaíonn. Má tá tú chun spéis rómánsúil a chur i nduine éigin, caithfidh go bhfeictear duit go bhfuil an duine sin tarraingteach. Is fíor nach féidir féachaint ar ghluaiseachtaí nó gothaíochta an duine leis an áis – rudaí a chuireann go mór le tarraingt an duine – ach mar sin féin, tugann grianghraf de dhuine an-chuid eolais mar gheall ar an duine sin agus is féidir cinneadh a dhéanamh bunaithe ar an méid a fheiceann tú den phearsantacht sa ghrianghraf. Níor cheart go mbeadh an áis in ionad an ghnáthshaoil ar aon nós, ach go mbeadh sí mar rud breise ann chun cur leis an gcomhluadar sóisialta atá agat.

Agus déanann sí é sin níos fearr ná aon ghréasán nó seirbhís geandála eile. Bunaíodh Tinder ar smaoineamh na seanáise Grindr ach tá treise ag an bpáiste nach raibh ag a athair, más ea: ceanglaíonn an áis nua do chuntas Tinder le do chuntas Facebook agus nuair a fhéachann tú ar phróifíl duine éigin eile ar Tinder, taispeánann sé duit má tá comhchairde eadraibh ar Facebook. Sa chaoi seo, tá an áis níos sábhailte ná leithéidí Grindr toisc gur féidir leat ‘taighde’ a dhéanamh ar an duine sula mbuaileann tú leis nó léi chun dearbhú nach slíomadóir é nó í.

Tá an drogall a bhíodh ar an ngeandáil ar líne ag leá le gach croí a eitlíonn ó ghuthán go guthán trí Tinder agus mar gheall ar an méid comhchairde a fheicfeas tú ar an rud – déanann sé seo normálú ar áis a bhíodh aisteach agus coimhthíoch tráth. Tá an gheandáil níos láithrí agus níos féinstiúrtha ná riamh agus tá deis agat féin bualadh le duine nua spéisiúil inniu mar gheall ar an áis seo. Féach é agus cá bhfios nach mbuailfidh splanc Tindrí tusa leis?