Tá tú ag taisteal go Meiriceá nó go dtí an Astráil nó go dtí an tSeapáin. Isteach san eitleán leat. Tá rogha agat; casann roinnt daoine (réaltaí roc, baincéirí agus a leithéid) ar chlé, agus ar aghaidh leo go dtí na suíocháin mhóra chompordacha. Ach tá formhór na bpaisinéirí ag casadh ar dheis, i dtreo suíochán atá i bhfad níos lú agus i bhfad níos míchompordaí.

Sin mar a bhíonn de ghnáth ar eitilt chianaistir. Ach tá dhá shórt athruithe le teacht. Tá níos mó aerlínte ag iarraidh samhail ghnó Ryanair nó easyJet a chur i bhfeidhm ar a n-eitiltí cianaistir. Agus ar an taobh eile den scéal, tá cúpla aerlíne nach bhfuil ach suíocháin mhóra ina n-eitleáin acu, den chineál a bhíonn ar fáil sa ghrád gnó de ghnáth. Mar sin, níos mó ná riamh, beidh an dá chineál paisinéara ar eitleáin éagsúla.

Aeriompar ar chostas ísealBhí Ryanair agus easyJet ar na céad aerlínte san Eoraip a chuir tús le haeriompar ar chostas íseal. Ag cóipeáil samhla de chuid Southwest Airlines i Stáit Aontaithe Mheiriceá a bhí siad. Bhí an-difríocht i gcónaí idir Southwest agus na haerlínte eile Meiriceánacha; níor thug Southwest aon bhia dá bpaisinéirí, ach amháin paca pis thalún.

Bhí rialacha casta ag na haerlínte traidisiúnta. Chaithfeá fanacht as baile tráthnóna Dé Sathairn chun ticéad níos saoire a fháil, cuir i gcás. Ní raibh praghsanna Southwest chomh casta nó chomh hard. D’fhan eitleáin de chuid na n-aerlínte traidisiúnta ar an talamh ar feadh uair amháin, nó níos mó, idir dhá eitilt. Thuig Southwest nach bhféadfadh siad brabús a dhéanamh ach amháin nuair a bhí a n-eitleáin ag eitilt. Mar sin, is minic go mbíonn stad acu idir teacht agus imeacht nach maireann ach ar feadh 10 nó 15 nóiméad (stadann eitleáin Ryanair ar feadh 25 nóiméad de ghnáth). Imíonn an chéad eitilt go han-luath ar maidin, agus filleann an t-eitleán deireanach go mall san oíche.

Ón am sin i leith, tá neart aerlínte eile, Aer Lingus ina measc, ag dul sa treo céanna. Ach go dtí seo, tá béim curtha acu ar eitiltí gearraistir - trí huaire, nó níos lú, san aer. Cén fáth nach bhfuil níos mó dá leithéid ag trasnú an Atlantaigh, nó ag dul go dtí an Astráil?Bhuel, ní féidir le haerlíne an méid céanna buntáistí a bhaint as samhail ísealchostais ar aerbhealach cianaistir. Ní bhíonn an rogha chéanna maidir leis an am imeachta i gceist i gcás aerbhealaí cianaistir. Imíonn beagnach gach eitilt ón chósta thoir Mheiriceá go dtí an Eoraip idir 6.00 p.m. agus 11.00 p.m., cuir i gcás. Agus ní bhíonn an tsaoirse chéanna ag na haerlínte níos mó eitiltí fada a bhrú isteach sa lá.

Maidir leis na maoir eitleáin ar na haerbhealaí cianaistir - a thugann do bhia agus do dheoch duit idir Baile Átha Cliath agus Nua-Eabhrac - de réir na rialacha, is cóir go mbeadh deis acu a scíth a ligean ar feadh lá nó dhó tar éis dóibh gach turas trasatlantach a chríochnú. Ní féidir le haerlíne iad a chur ag obair chun costais tuarastail a spáráil a thuilleadh.

In ainneoin na ndeacrachtaí uile, tá seirbhísí ag roinnt aerlínte cianaistir atá cosúil le haeriompar ar chostas íseal. Ar eitilt thrasatlantach Aer Lingus, caithfidh tú íoc as deochanna, ach tá bia agus scannáin san áireamh i bpraghas an ticéid. Tá an tsamhail chéanna ag aerlínte eile - Zoom, mar shampla, a théann ón Bhreatain Mhór go Ceanada, nó Oasis a théann ó Londain go Hong Cong. Ach níl cuid mhór acu ann.

Ní sin mar a shamhlaíonn Michael O’Leary, príomhfheidhmeannach Ryanair, seirbhís chianaistir ar chostas íseal, áfach. Dar leisean gur cheart duit íoc as do rogha suíocháin, as bia, as scannán, as ceol, agus as bagáiste. Dála Ryanair, thuirlingeodh an t-eitleán in aerfort beag, iargúlta agus saor, turas bus cúpla uair an chloig ó Nua-Eabhrac nó ó Bhostún.

An samhail mhaith é seo? Dar le haerlínte áirithe, is ea. Mar shampla, d’fhógair aerlíne rathúil Mhalaeisiach, a chuireann ar fáil eitiltí ar chostas íseal, le déanaí go bhfuil siad chun fochomhlacht cianaistir a chur ar bun. AirAsia a thugtar orthu agus saghas “Ryanair na hÁise” atá iontu. Ach is léir nach mbeidh na haerlínte traidisiúnta ag géilleadh slí go luath. Tuilleann siad go leor brabúis as na paisinéirí a thaistilíonn sa ghrád gnó nó sa chéad ghrád chun ticéid na ndaoine a thaistilíonn “sa stíris” a mhaoiniú, agus is iomaitheoirí láidre iad.

Coincheap nua

Mar a tharlaíonn, tá roinnt acu ag smaoineamh cheana féin ar shlite eile iomaíochta. Tá coincheap nua do chábán grád barraine fógartha le déanaí ag Lufthansa. Dórtúr atá i gceist acu, agus is dócha go mbeidh sé níos compordaí ná 10 nó 20 uair an chloig a chaitheamh i suíochán cúng.

Tá roinnt aerlínte nua anois ag forbairt choincheap an chompoird - ní chuireann siad ach suíocháin ghrád gnó amháin ina n-eitleáin. Dá bhrí sin, níl ach b’fhéidir 100 suíochán mór in eitleán a bhfuil go leor spás do 200 gnáthshuíochán ann. Ag an am céanna, díolann siad na ticéid ar phraghas níos ísle ná an gnáthphraghas a bheadh ar thicéad grád gnó le haerlíne thraidisiúnta. Téann Silverjet idir aerfort Luton i Londain agus Nua-Eabhrac agus £1,000 an praghas atá ar an ticéad fillte is saoire. Tá Maxjet agus Eos ag dul ó Stansted go Nua-Eabhrac, agus L’Avion ó Pharás go Nua-Eabhrac. Is margadh mór, saibhir agus tarraingteach é Nua-Eabhrac, ach tá na comhlachtaí seo ag caint faoi cheannphointí eile freisin. Dála an scéil, níl aon duine ag caint go fóill faoi thús a chur leis an gcineál seo seirbhíse ó Bhaile Átha Cliath. Ach lá éigin, b’fhéidir...

Seo thuas cúpla ceann de na comharthaí go bhfuil an margadh cianaistir á roinnt.

In ionad eitleán mór amháin a bheith ar fáil do gach duine, déanfaidh cuid de na paisinéirí an turas in eitleán compordach, lán le suíocháin ghrád gnó, agus an chuid eile acu in eitleán atá níos saoire agus i bhfad níos cúinge.

Níl tharlaíonn aon fhorbairt i dtionscal na heitlíochta gan impleacht a bheith aici don chomhshaol. Bíonn scairdeitleáin mhóra níos éifeachtúla ná scairdeitleáin bheaga mar go mbíonn níos lú breosla in aghaidh an tsuíocháin i gceist sna cinn mhóra. Mar sin de, má úsáidtear dhá eitleán in áit eitleán amháin, caithfear níos mó breosla. As seo amach, is dócha go mbeidh níos mó cánach ar phraghas an aerthurais chun íoc as an truailliú. Ach má chuirtear cáin €50 nó €80 nó €100 ar thuras cianaistir, ísleoidh an t-éileamh ar an tseirbhís níos saoire in áit an éilimh ar thurais ghrád gnó. B’fhéidir nach mbeidh seans ag an tionscal nua seo mórán forbartha a dhéanamh sula múchfar é.