Ba mhaith liom triúr ball de Chumann Lúthchleas Gael (CLG) a chur in aithne daoibh an mhí seo.

Tá Oisín 20 bliain d’aois agus tá sé ag imirt peile agus iománaíochta ó bhí sé beag bídeach. Ba bhreá leis na cluichí ón gcéad lá a rug sé ar chamán agus ar liathróid. Imríonn sé le foirne faoi bhliain is fiche agus sinsearacha a chlub sa pheil agus san iomáint. Is ball díograiseach é dá chlub agus is breá leis imirt in éineacht leis na cairde atá aige ó bhí sé sa naíonra (naíonra an CLG atá i gceist).

Imríonn Oisín chomh maith le foirne iomána agus peile an choláiste 3ú leibhéal mar a bhfuil sé ina mhac léinn. Is imreoir cumasach é, chomh cumasach sin gur roghnaíodh é ar fhoireann mhionúr an chontae sa pheil agus san iomáint dhá bhliain i ndiaidh a chéile, go bhfuil sé anois ar phainéil pheile agus iomána an chontae sa ghrád faoi bhliain is fiche.

Spíonadh

Bíonn Oisín ag traenáil go minic, gach lá geall leis, uaireanta faoi dhó in aon lá amháin de thoradh líon na bhfoirne a bhfuil sé ag imirt leo faoi láthair. Is breá le hOisín an traenáil ach le tamall anuas bíonn sé spíonta go minic, chomh spíonta sin gur thit ina chodladh cúpla uair i rith léachtaí sa choláiste le déanaí. Tharla uair nó dhó go ndeachaigh sé chuig an ionad mícheart ag an am mícheart don traenáil.

D’fhéadfaí a rá go bhfuil Oisín tiomanta. Ba chuma leis a bheith ag imirt nó ag traenáil gach lá den bhliain ach tuigeann sé nach bhféadfaí sin a dhéanamh. Tuigeann sé go bhfuil sé tábhachtach ag imreoir a scíth a ligean go rialta – dúirt gach bainisteoir a bhí aige riamh an méid sin - ach ní dúirt aon duine acu cén uair ba chóir é a dhéanamh. Deir gach bainisteoir chomh maith go gcaithfidh sé díriú ar fhoireann amháin nó b’fhéidir ar dhá cheann ach níl aon duine acu tar éis a rá leis éirí as an bhfoireann a bhfuil sé féin mar bhainisteoir uirthi.

Le déanaí fuair Oisín cuireadh ó bhainisteoir sinsearach peile agus ó bhainisteoir sinsearach iomána an chontae teacht ag traenáil leis an bpainéal sinsearach. Níl fhios ag Oisín cén rogha a dhéanfaidh sé – peil nó iomáint? Ní mian leis cinneadh a dhéanamh ach tá fhios aige go mbeidh air. Cé chuirfeas comhairle a leasa air?

Dara

Tá Dara 25 bliain d’aois agus i mbarr a chumais mar iománaí lena chlub. Chinn sé roinnt blianta ó shin go gcloífeadh leis an iomáint óir is é an cluiche is ansa leis. Ó chríochnaigh sé iarchéim san oideachas dhá bhliain ó shin tá Dara ina mhúinteoir bunscoile agus téann sé ag traenáil lena fhoireann club dhá oíche sa tseachtain agus ag an deireadh seachtaine bíonn seisiún traenála nó dhó aige nó cluiche. Déanann Eoin oiliúint bhreise go haonarach, cleachtadh ar a chuid scileanna, sa chúirt iomána a tógadh le taobh an chlubthí cúpla bliain ó shin. Múineann Dara scileanna na hiomána do na gasúir atá faoina chúram sa scoil. Níl ach ábhar clamhsáin amháin ina shaol agus is é sin easpa cluichí iomána lánbhrí, rialta. Bíonn corrchluiche dúshláin ag tús na bliana, agus cúpla cluiche sraithe i mí Aibreáin, cúpla cluiche craobhchomórtais i mí na Bealtaine agus sin a dheireadh go dtí an dara leath de Lúnasa ar a luaithe. Is é an fáth leis sin go dtugtar tús áite d’fhoirne sinsearacha an chontae agus go dtí go mbíonn na foirne sin réidh le cluichí idirchontae bíonn na foirne club gan chluichí cearta comórtais i gcaitheamh an ama. Cuireann an leagan amach seo olc ar Dhara ach níl fhios aige cad is féidir leis nó lena chomhghleacaithe a dhéanamh faoi.

Dónall

Tá Dónal 50 bliain d’aois agus d’imir sé le foireann shinsearach peile an chontae ar feadh seacht mbliana agus é ina óigfhear. D’imir sé i gcluiche ceannais na hÉireann faoi dhó agus tá bonn amháin uile Éireann aige. Tá sé an-mhórálach as an ngaisce a rinne sé agus tá cuimhní iontacha aige ar a thréimhse ghairid mar imreoir contae agus club. B’éigean dó éirí as an imirt ag aois seacht mbliana fichead de dheasca a ghortaithe. Inniu, tá Dónal an-bhacach de thoradh na ngortaithe a bhain dó le linn a laethanta imeartha. Sracadh ballnaisc ina ghlúin dheas agus é i lár na bhfichidí, briseadh a rúitín clé uair eile, agus tá a chromán ag cur as dó ó bhí sé naoi mbliana déag d’aois. Ta sé ag fanacht anois le glaoch ón otharlann le go rachaidh sé faoi scian agus cromán nua saorga a fháil dó féin. Teastaíonn sé sin uaidh go géar – tá pian uafásach ina chromán ag cur as do le fada agus níl sé in ann siúl i gceart. Tá súil aige a bheith in ann corrchluiche gailf a imirt tamall tar éis na hobráide.

Níl anseo ach scéal triúir de chuid CLG. Tá mílte eile ann agus a scéal féin ag chuile dhuine. Is fada an lá fadhbanna mar iad sin thuas ag crá imreoirí. Tuairiscíodh le déanaí go bhfuil céatadán níos airde d’imreoirí óga ag éirí as na cluichí Gaelacha ná mar atá i gcás spórt eile in Éirinn. Ní mór don CLG gan staonadh den scrúdú grinn ar gach gné de reáchtáil na gcluichí agus pleanáil chuí a dhéanamh ar mhaithe le himreoirí ag gach leibhéal agus ag gach aois.