An rud is fearr faoi cheamaraí digiteacha ná gur féidir an t-uafás grianghraf a ghlacadh leo. Ach, faraor, níl sé praiticiúil iad ar fad a chur isteach i leabhar grianghraf - rud a d’fhág go mbíodh a bhformhór ag fanacht faoi cheilt. Anois, áfach, tá scata slite ann chun grianghraif a roinnt le daoine eile.

Mura bhfuil ach cúpla grianghraf le clóbhualadh, de ghnáth oireann sé iad a chlóbhualadh ar scairdphrintéir sa bhaile. Leis an bpáipéar ceart is féidir torthaí an-phroifisiúnta a fháil ar an gcaoi seo. Ach is cur chuige daor é seo - tá an páipéar speisialta snasta costasach agus ídíonn na cartúis dúigh go tapa nuair a bhíonn grianghraif á gclóbhualadh. Is féidir teacht ar leaganacha saora den pháipéar agus den dúch, ach is fearr iad a fháil ón gcomhlacht a rinne an printéir féin chun an “triantán draíochta” d’earraí a chur i bhfeidhm. Deirtear go gcinntíonn an triantán seo - idir phrintéir, pháipéar agus dhúch - an caighdeán grianghraf is airde.

Nuair a bhíonn tú ag clóbhualadh na ngrianghraf tú féin, bíonn a lán saoirse agat triail a bhaint as modhanna éagsúla chun iad a phróiseáil agus a fheabhsú. Ach is míbhuntáiste í an tsaoirse seo freisin toisc go bhfágann sé gur féidir le níos mó rudaí dul amú. Agus cosnaíonn gach botún airgead - idir chostas an pháipéir atá curtha amú agus an dúigh atá ídithe.

Ar ndóigh is féidir dul go dtí gnáthshiopaí grianghraf agus iad siúd a íoc chun na grianghraif a chlóbhualadh duit. Cé go gceapann daoine go bhfuil na siopaí sin daor, de ghnáth bíonn an chostas in aghaidh an ghrianghraif níos saoire ná iad a chlóbhualadh sa bhaile - go háirithe má tá a lán grianghraf le próiseáil. Buntáiste eile ná go ndeirtear go maireann na grianghraif níos faide agus nach n-éiríonn na dathanna níos laige iontu. Freisin, má théann aon rud amú leis an gclóbhualadh ní gá duit féin íoc as - is féidir leat dul ar ais go dtí an siopa agus do chuid airgid a fháil ar ais.

Ar an drochuair, bíonn sé beagáinín casta a chinntiú go gclóbhualann siopaí na híomhánna cearta duit. De ghnáth tugann tú na grianghraif dóibh ar chárta cuimhne digiteach agus déanann siad gach uile phictiúr a phróiseáil. Go minic, ní bhíonn gach grianghraf ag teastáil agus is cur amú airgid an modh oibre sin. Is fearr, mar sin, na grianghraif atá uait a dhó ar dhlúthdhiosca roimh réidh agus an diosca sin a thabhairt don siopa, in áit an chárta grianghraf luachmhar. Le déanaí, tá botha nua á gcur ar fáil i roinnt siopaí áit ar féidir leat na grianghraif atá uait a roghnú ón gcárta cuimhne roimh réidh. Áis an-úsáideach é seo i bprionsabal ach, faraor, tógann sé a lán ama ar dhaoine na grianghraif a roghnú - rud a fhágann go mbíonn scuaine fhada ag na gléasanna seo i gcónaí.

Uaschóipeáil

Má tá teacht agat ar leathanbhanda is féidir na grianghraif atá uait a uaschóipeáil go dtí comhlachtaí grianghraf ar líne. Mar shampla, tá cáil áirithe ar na seirbhísí ag www.bonusprint.ie agus www.photobox.ie. Tar éis duit na grianghraif atá roghnaithe agat a sheoladh chucu thar an idirlíon is féidir iad a íoc le cárta creidmheasa chun na híomhánna a chlóbhualadh duit agus a sheoladh ar ais sa phost chugat. Cé go bhfuil an chuma air gur comhlachtaí Éireannacha iad seo ó na seoltaí idirlín “.ie” atá acu, tá siad lonnaithe ar fud na hEorpa. Is léir go gceapann siad go mbeidh daoine níos sásta gnó a thabhairt do chomhlacht “áitiúil"!

Bíonn na seirbhísí seo réasúnta saor (cé gur gá íoc as costais phoist anuas ar an gcostas próiseála) agus ní thógann sé rófhada orthu na grianghraif a sheoladh ar ais chugat de ghnáth. Má tá a lán íomhánna le clóbhualadh agat is áis an-mhaith iad na seirbhísí seo. Ar ndóigh, is fearr iarraidh orthu méid beag a phróiseáil ar dtús báire ionas gur féidir leat a chinntiú go bhfuil tú sásta leis an gcaighdeán íomhá a sholáthraíonn siad. Ní i gcónaí a bhíonn an caighdeán is fearr ag na comhlachtaí is saoire!

Mura bhfuil tú ag iarraidh na grianghraif a chlóbhualadh in aon chor, is féidir iad a chur ar fáil ar an idirlíon - ansin is féidir le daoine eile iad a fheiceáil go héasca agus ní gá duit íoc as próiseáil. Tá go leor seirbhísí ar líne ann a ligeann duit do leabhar grianghraf féin a chruthú ar shuíomh gréasáin speisialta agus a chinntiú go bhfuil do lucht aitheantais amháin in ann é a fheiceáil. Agus má cheapann tú go bhfuil do ghrianghraif an-deas agus go bhféadfadh daoine ar fud an domhain úsáid a bhaint astu, d’fhéadfá iad a chur ar fáil saor in aisce ar shuímh mar www.sxc.hu - suíomh a mbaineann a lán dearthóirí grafacha ilmheán úsáid as.

Leis na háiseanna seo ar fad, is cinnte go mbeimid in ann ár ngaolta a chrá le grianghraif leadránacha ónár gcuid laethanta saoire go ceann tamaill eile!

Is léiritheoir é Diarmaid Mac Mathúna sa rannóg chorparáideach in Agtel (www.agtel.ie), comhlacht neamhspleách teilifíse atá lonnaithe i mBaile Átha Cliath. Bíonn sé ag obair ar fhíseáin, tionscadail DVD agus suímh ghréasáin do raon leathan eagraíochtaí agus tá baint aige leis an tsraith teilifíse “An Tuath Nua” freisin.