Tá sé suimiúil an dóigh a bhfuil ag éirí le clár teilifíse, a bhfuil buiséad measartha íseal ag baint leis, polaiteoirí na tíre seo a chur faoi bhrú. Mar chlár teilifíse, ní thiocfaí a rá go bhfuil mórán stíle nó cruthaitheachta ag baint le “Rip-Off Ireland”, ach sa chás áirithe seo is í an teachtaireacht atá á tabhairt, seachas an tslí a bhfuil sí á cur i láthair, atá ag spreagadh daoine chun díospóireachta.

Tá láithreoir an chláir, an Corcaíoch Eddie Hobbs, gona chanúint ghéar dhúchasach, ag díriú go neamhbhalbh ar an tslí a bhfuil ar cháiníocóirí na tíre seo bheith ag streachailt leis an saol agus, ag an am chéanna, bheith ag íoc as drochbhainistíocht i gcás tionscadal mór caipitil a gcaitear na milliúin euro breise orthu ná mar a bhí sé i gceist a dhéanamh.

Tá polaiteoirí an Rialtais ar a mbealach ar ais óna saoire na laethanta seo agus is dócha nach dtuigeann siad i gceart go fóill cad é atá i ndiaidh tarlú. Gach oíche Luain, tá Eddie Hobbs ina sheasamh os comhair lucht féachana in Amharclann an Helix i mBaile Munna agus sé chéad míle duine eile ina suí sa bhaile ag breathnú ar a thuairiscí cáinteacha.

Tá an t-iaraire Máire Uí Ruairc tar éis buille a fháil mar gheall ar an ró-chaiteachas faoi thrí a bhí i gceist maidir leis an Luas i mBaile Átha Cliath. Cuireadh tairne eile i gcónra Phádraig Uí Fhloinn, an tIaraire Trádála, Tráchtála agus Turasóireachta, nuair a rinneadh iniúchadh ar na socruithe a rinneadh leis an chomhlacht National Toll Roads (NTR), atá i gceannas ar dholadhroichead an M50. Chaill Máirtín Ó Coileáin aon chreidiúnacht a bhí fágtha aige nuair a tugadh cur síos sa chlár ar an chóras vótála leictreonaí agus ar an chostas atá ag baint le stóráil an trealaimh agus gan é á úsáid ar chor ar bith.

Tá polaiteoirí áirithe go láidir den tuairim nár cheart go mbeadh an tseirbhís náisiúnta craoltóireachta ag tabhairt deise do chomhlacht neamhspléach an cáineadh seo a dhéanamh agus tá an Cathaoirleach de choiste amháin Dála ag rá gur cheart ceannairí RTÉ a thabhairt os a gcomhair láithreach bonn!

Beidh sé suimiúil feiceáil cad é atá i ndán don chlár “Rip-Off Ireland”. Bheifeá réasúnta cinnte de do chuid airgid dá gcuirfeá geall nach mbeidh an dara sraith ann! Tuigeann polaiteoirí, go háirithe lucht an Rialtais, gur féidir leis an taoide casadh go fealltach ina n-aghaidh; seans gur seo an chéad mhaidhm!