Díol mé mo chéad táirge ar líne le déanaí. Díol mé fiche meall snáithe trí Ravelry, an líonra do “yarnies”. Tá uirlis acu a ligeann duit do chuid snátha a aicmiú agus a roinnt le húsáideoirí an tsuímh le díol nó le malartú. D’fhiafraigh bean indiach sa Mheiriceá thuaidh díom cé mhéad ar 20 meall snátha. Rinneamar roinnt stangaireachta, shocraíomar ar luach agus gan aon ní seachas mo sheoladh r-phoist, sheol mo chara nua le nós cniotála uafásach $45 chugam trí PayPal.

Is tús impireacht olla é gan amhras! Ach an rud a chuir ionadh orm ná a éasca a bhí sé orainn airgead a aistriú ó thír amháin go tír eile. (Cé go bhfuil a fhios agam go bhfuil margadh dubh fothalún na holla ag cur ionadh as cuimse ortsa, a léitheoir dhil.)

Fós féin bhí an idirbheartaíocht seo ciotach go leor: bhí orainn seoltaí r-phost a roinnt; bhí orainn beirt cuntais PayPal a bheith againn; ní raibh aon cinnteacht nó sabháilteacht ann do cheachtar againn.

Ach tá cúpla comhlachtaí ann atá ag athscríobh rialacha airgid agus idirbheartaíochta airgid. Ar ndóigh, tá PayPal ina measc. Seo thíos liosta de na seirbhísí airgid is fearr ar líne is ar fóin faoi láthair. Cé go bhfuil ceann nó dhó nach bhfuil le fáil anseo go fóill, tá súil agam go bhfeicfimid a leithéid anseo go luath.

PayPal

Muna bhfuil cuntas PayPal agat go fóill molaim ceann a oscailt láithreach. Is féidir PayPal a nascadh le do ghnáthchuntas bainc agus do chárta creidmheasa más mian leat. Ach ní gá cárta creidmheasa a nascadh leis. Ciallaíonn sé seo, san ré bhocht bhriste seo, gur féidir leat an cárta creidmheasa a ghearradh suas agus an ciste atá agat a úsáid in ionad creidmheasa nuair a bhíonn tú ag siopadóireacht ar líne. Ghlactar le PayPal thall is abhus agus de réir mo thaithí, tá sé i bhfad níos fusa aighneas a réiteach tríothú ná mar atá le Visa. Tá App iPhone, Blackberry agus Android acu freisin.

SmartyPig

Tá cúpla seirbhísí mar seo agus tá a fhios agam go bhfuil roinnt bainc thraidisiúnta ag breathnú ar an múnla seo mar sheirbhís bhreisluacha. Scríobh mé tamall ó shin faoi chúrsaí sláinte agus conas éirí níos aclaí nó meáchan a chailliúnt le cabhair theicneolaíochta. Cúpla bunrudaí a bhí ann ná sprioc réadúil a bheith agat agus na spriocanna sin a roinnt le do chomhluadar chun tacaíocht a chaomhnú. Anois, is ionann seo agus bunphrionsabail SmartyPig. Is féidir sprioc coigilte a bhreacadh isteach, nasctha de ghnáth, le hócáid nó le táirge, le laethanta saoire nó le ríomhaire nua cuirim i gcás. Má tá cuntas bainc sná Stáit Aontaithe agat, tig leat an cuntas a nascadh leis agus íocaíochtaí rialta a chur leis ón gcuntas. Is féidir do sprioc a roinnt thar do líonraí sóisialta freisin. Gheobhaidh tú tacaíocht mar sin ó do chomhluadar agus is féidir leo cur leis an gciste gan stró más mian leo. An loighic atá ag SmartyPig ná in ionad creidmheas a íoc ar ais, is féidir an t-airgead céanna a chur ar leataobh is é á thuilleamh agat.

Úsáideann na seirbhísí Simple agus Mint an bunphrionsabal céanna ach taispeánann siad an tionchar ar do chuntais agus do spriocanna a bheadh ag caitheamh ar leith agus d’inniúlacht billí agus caithimh eile sa ghearrthéarma a íoc.

Tá neart feidhmchláiríní ann freisin chun do chuid costaisí a thaifeadadh, rud a chabhródh go mór leat do chuid nósanna caithimh a thuiscint. Úsáidim féin XpnsTrckr ar an iPhone a ligeann dom taifead a dhéanamh go héasca de mo chostaisí gnó. Tá AIB freisin tar éis feidhmchláirín a sheoladh agus is fiú go mór a leithéid go háirithe ó tá an méid sin scimmearacht ar siúl: caithfidh tú do chuntas bainc a sheiceáil go minic minic.

Bumppay

Daoibh siúd a bhfuil iPhone agaibh bígí ag súil le Bumppay. Ligeann an tseirbhís seo do bheirt daoine airgead a sheoladh ó iPhone go hiPhone trí iad a bhualadh in aghaidh a chéile ina nglaic. Oibríonn sé trí PayPal agus seo fáth eile gur fiú go mór cuntas PayPal. Ciallaíonn sé seo nach mbeidh náire ar éinne arís nuair a tagann an bille agus níl aon bhriseadh nó airgead tirim acu.

Pingit

Ach is iad chustaiméirí Barclays Bank na Breataine Mhóra atá ag maireachtáil sa todhchaí. Le seoladh na seirbhíse nua seo, is féidir airgead a sheoladh ón fheidhmchláirín Pingit chuig aon duine a bhfuil a seoladh r-phoist mar theagmháil i do fóin agat. Ní gá fiú a bheith mar chustaiméir le Barclays - a fhad is atá cónaí ort sa Bhreatain, agus cuntas bainc agat sa tír agus a fhad is atá an feidhmchláirín agat is féidir do sporán Pingit a líonadh in aon chraobh de Barclays agus é a úsáid díreach mar sparán chun airgead a chur chuig do theagmhálaí nuair is gá. Tá mé in éad mhór leo.