‘An ghaoth aduaidh bíonn sí cruaidh,’ dar leis an dán, ach is cosúil go bhfuil achan ghaoth a shéid inár dtreo le cúpla mí anuas crua agus fuar, feannaideach agus anfach. Tháinig cuid de na gaotha aniar aduaidh orainn, cé gur aniar aneas a tháinig siad – má thuigeann sibh mé, a léitheoirí dílse. Ní bheidh mórán teacht aniar fágtha i ndaoine má leanann an ghaoth aduaidh gan staonadh. ‘An ghaoth aniar bíonn sí fial is cuireann sí iasc i líonta,’ a deirtear, ach nach aisteach an rud é gur tháinig na mílte tonna de chlocha beaga agus clocha móra, d’fheamainn ghaoithe agus d’fheamainn raice, agus de ghaineamh mín ghrinneall na mara i dtír le linn na stoirmeacha, agus nár tháinig iasc ar bith! ‘Ní hé lá na gaoithe lá cóirithe na líonta ná lá daingnithe na ndíonta ná lá deisithe na mballaí farraige,’ a deir Balor an Saoi agus an Gaothaire.

‘Is olc an ghaoth nach séideann leas duine éigin,’ a dúirt ceannaire Uisce Éireann. ‘Is linne gach uile bhraon d’uisce in Éirinn anois, fiú uisce na farraige a thagann i dtír agus uisce na díleann a thiteann anuas ón spéir orainn. H2O atá ann agus mar sin is linn é – agus íocfaidh sibhse go daor as. Chonacthas roinnt daoine amuigh faoin fhearthainn i gConamara agus i gCorca Dorcha agus iad ceann-nochta! An é go síleann siad nach dtuigeann muid gur ag ní a gcuid gruaige saor in aisce a bhí siad. Tá fianaise againn go bhfacthas sobal gallúnaí ag sileadh anuas thar chótaí báistí roinnt acu. Thángthas ar bhean amháin i dTír Chonaill agus í amuigh sa stoirm bháistí gan tointe ar a cloigeann. Ach nuair a cuardaíodh cochall a cóta thángthas ar bhuidéal Pantene Smooth and Sleek Shampoo with Anti-Ageing Serum! Samhlaigh sin i gcochall do chóta trí thimpiste, mar dhea!’

An tUasal Ó Srutháin

Tá Garth Brooks le teacht go Páirc an Chrócaigh. Dúirt urlabhraí an CLG go mbeadh dhá stoirm cheoil aige sa cheanncheathrú agus bhí gach duine sásta, a bheag ná a mhór, leis an socrú sin. Ach ansin chuala Garth Brooks (nó Gearóid Ó Srutháin, mar a thugann sé air féin nuair a bhíonn sé in Éirinn) go raibh comharsana Chumann Lúthchleas Gael ag lorg tuilleadh stoirmeacha ceoil le go mbeadh na sráideanna beaga cúnga thart ar Pháirc an Chrócaigh plódaithe le meisceoirí agus múisceoirí as achan chontae in Éirinn, nach mbeadh aon bhealach isteach ná amach ag na cónaitheoirí agus go mbeidís mar a bheadh cimí ina gcuid tithe beaga féin. Dúirt an tUasal Ó Srutháin go raibh cairde aige in áiteanna ísle agus gur thuig sé a gcás, agus chinn sé féin agus muintir CLG ar thrí stoirm cheoil eile a chur ar siúl. Tá sé ag cur brú ar údaráis an CLG Páirc an Chrócaigh a líonadh le huisce ar na hócáidí sin agus go mbeidh sé féin ar ardán ar snámh i lár na páirce – díreach ar mhaithe le muintir na hÉireann a bheith ar a gcompord. Beidh cruinniú aige le muintir Uisce Éireann sa neastodhchaí. Osclóidh sé gach ceann de na cúig stoirm cheoil leis an amhrán céanna: The Thunder Rolls.

Bhí níos mó ná an drochaimsir mar ábhar comhrá ag muintir na hÉireann le linn na míosa atá díreach thart. Bhí Miss Panti Bliss ann chomh maith. Banríon draig atá ann agus is iontach an fear é. Ach is í an cheist mhór ná an bhfuil an tUasal Panti Bliss ag fáil céatadáin den airgead a thugann RTÉ amach do dhaoine a mhothaíonn go bhfuil Miss Panti i ndiaidh iad a mhaslú? Ní gá don Uasal Bliss ach dul ar chlár teilifíse ar feadh cúpla bomaite agus a rá go bhfuil a leithéid seo nó a leithéid siúd hómafóbach, agus bíonn RTÉ sásta airgead mór a íoc lena leithéid seo nó a leithéid siúd chun nach gcuirfí an dlí orthu.

Rás Putin ina Chúlóg ar Each

Ba bhreá le Balor dul ar chlár le Miss Panti, ach beidh air dul sa scuaine. Tá na céadta ann roimhe, agus amuigh chun tosaigh ar na céadta sin tá Vladimir Putin na Rúise. Dúirt an tUasal Putin linn ar na mallaibh go mbíonn sé ag taibhreamh faoi Panti gan stad; agus gur thit sé i ngrá le Miss Bliss an chéad uair a chonaic sé é ar an Saturday Night Show. Deir Putin gurb é mian a chroí é féin agus Panti a bheith ar muin capaill agus iad beirt droimnocht; eisean ar chúl agus Panti chun tosaigh, ag sodar go bog trí mhachairí báite na hÉireann, agus Putin ag cogarnach go ciúin isteach i gcluaisín Miss Panti. Beag seans go bhfeicfidh muid Miss Panti ar an Late Late Show go ceann i bhfad.

Tá cás cúirte Thriúr Anglo ag dul ar aghaidh i rith an ama. Deirtear gurb é an chéad chás cúirte riamh in Éirinn a bhfuil rabhadh sláinte ag dul leis. Tá fógra mór in aice le doras na cúirte ag cur foláirimh ar an phobal agus iad ag dul isteach chun éisteacht leis: D’fhéadfadh an cás cúirte seo dochar a dhéanamh do shláinte duine! Agus tá an ceart ar fad ag an duine a chroch an fógra. Lá i ndiaidh lae, ón am ar thosaigh an cás, bíonn otharcharranna ag teacht le daoine a thabhairt chun na hotharlainne. Is iad na sainchomharthaí is coitianta a bhíonn ar na hothair ná: fearg as an ghnách a chuireadh baol an urchair mhillte ar dhuine agus dúlagar domhain a chuirfeadh baol báis ar dhuine. Samhlaigh muintir bhocht an choiste chúirte ag éisteacht le scéalta faoi na milliún euro á gcaitheamh ar chóisirí agus ar bhronntanais, agus iad féin ag fáil €20 sa lá le bia agus taisteal a chuimsiú. Bheidís níos fearr as amuigh faoin tuile bháistí.