Ba sa bhliain 2005 a rinneadh an chéad Alfa Romeo 159 agus tugadh isteach in áit an 156 í. Nuair a chonaic muintir na hEorpa an 159 den chéad uair thit siad i ngrá léi agus bhí an t-aiseolas fúithi chomh maith sin gur ghnóthaigh sí an tríú háit i nDámhachtainí Eorpacha Charr na Bliana 2006. Cé nár díoladh an méid céanna den 159 i gcomórtas leis an 156, rinneadh 240,000 carr idir na blianta 2005 agus 2011.

Leis an ngreille thraidisiúnta a bhíonn ag Alfa Romeo, bhí an 159 níos mó ná an 156 agus bhí níos mó slí inti. Bhí sí níos troime chomh maith – agus níos faide leis. Cuireadh na meáchain bhreise agus na tomhais mhóra seo ar an 159 ionas go mbeadh sí níos tarraingtí do mhuintir Mheiriceá – áit nach raibh aon Alfa Romeo ó 1995. Agus níor éirigh le Alfa dul go Meiriceá fós!

Tá an 159 thar a bheith gnéasach mar charr, agus is rud é seo atá an-choitianta i ngluaisteáin de chuid Alfa Romeo. Ní hamháin go bhféachann an carr seo go hálainn taobh amuigh, ach tá an taobh istigh chomh galánta céanna. Tá cuma mhaith ar an gcarr seo ó gach taobh. Tá na diaileanna ar fad dírithe i dtreo an tiománaí agus tá na cuair ar fad ar an taobh amuigh le feiceáil istigh.

Féachaint an Bhóthair

Ó thaobh láimhseála ar an mbóthar de, tá an 159 i bhfad níos fearr ná an 156. Tá crochadh an chairr déanta de chnáimhín dúbailte ard de chuid an 156 – chomh maith le crochadh ilnascach ar an gcúl. Mar gheall ar an dá chineál crochta seo, gluaiseann an 159 níos míne ná an 156 agus tá roth stiúrtha i bhfad níos cruinne inti.

Ó thaobh chúrsaí sabháilteachta de, d’éirigh go maith leis an 159 i scrúduithe NCAP agus ghnóthaigh sí 5 réalta ar na meáin.

Cé gur tógadh an 159 go maith, tá fadhbanna coitianta bainteach léi, ach níl iontu seo ach rudaí beaga, i ndáiríre. An chéad rud a mbíonn úinéirí an 159 ag gearán faoi ná go mbíonn gliogarnach inti. Agus mura mbíonn úinéirí in ann foinse na gliogarnaí a aimsiú, cuireann siad an locht ar an gcnáimhín súgartha chun tosaigh. Is féidir leis an 159 a bheith trom ar na boinn chun tosaigh. Baineann an fhadhb seo leis an rianú agus is féidir í a leigheas go furasta trí dhul chuig siopa bonn nó chuig aon mheicneoir. Bíonn úinéirí ag gearán chomh maith faoi sholas bainisteoireachta an innill. Deirtear gur le slabhrathiomáint na ceamfhearsaide a bhaineann sé seo.

Óltach Chomh Maith

Rud eile a chuireann isteach ar dhaoine ar leo an 159 ná go mbíonn sí trom ar bhreosla – agus go mbaineann an fhadhb seo fiú leis an inneall díosail.

Tá an liosta seo ag éirí fada, ach níl ach cúpla fadhb eile atá coitianta a dhóthain le labhairt fúthu. Deirtear go mbíonn an chrág lochtach. Molaimse d’aon duine atá ag smaoineamh ar 159 a cheannach an chrág a fhéachaint i dtosach báire. Leag do spág uirthi agus, má thugann tú faoi deara go bhfuil sí ag stopadh leath bealaigh síos nó go bhfuil aon rud neamhghnách ag tarlú agus tú ag ardú do choise, iarr ar mhuintir an gharáiste féachaint uirthi agus í a dheisiú sula gceannaíonn tú í.

Anois, an pointe deireanach – rud a thug úinéirí faoi deara go han-luath tar éis dóibh an carr seo a cheannach! Coinnigh súil amach do hanla scaoilte an bhoinéid. Uaireanta bíonn sé sobhriste!

Go ginearálta tá clú measctha ar an Alfa Romeo. Deir an-chuid iriseoirí gluaisteán gur chaith Alfa an iomarca ama ar chruth an chairr, seachas ar an gcaighdeán. Is fíor go mbíonn fadhbanna ag baint le Alfa Romeo agus leis an 159, ach bíonn an-chuid de na fadhbanna sin ag gluaisteáin athláimhe i gcoitinne. Má tá tú ag smaoineamh ar 159 nó ar aon charr eile a cheannach, molaim duit duine éigin atá ar an eolas a thabhairt leat chun breathnú air. Cá bhfios, b’fhéidir go gceannófá seoid!