Is dóigh liom féin gur féidir le Toyota a bheith neamhspéisiúil, ach fiú leis na hathghlaonna ar fad a tharla le roinnt blianta anuas, is comhlacht iad ar féidir brath orthu fós. Go pointe, tá an mana sin, The Best Built Cars in the World, fíor – go pointe!

Ar aon nós, tá neart gluaisteán maith déanta ag Toyota in imeacht na mblianta – agus ceann acu sin ná an Toyota Avensis T250. Tháinig an Mark T250 ar an bhfód i 2003 in áit an Toyota Avensis T210/220, a bhí an-chosúil leis an Carina E. Is athrú ollmhór é an Avensis nua seo le hais an chinn roimhe. Tá stíl i bhfad níos deise ar an gcorp – agus roinnt athruithe déanta ar an inneall freisin.

Athraíodh an corp go hiomlán ar an T250. Tógadh an stíl ó na Francaigh, a leag béim ar leith ar chorp an chairr. Sa bhliain 2004 bhuaigh an Avensis seo an gradam, Carr na Bliana Semperit, agus tháinig sí sa cheathrú háit i ngradam Carr na Bliana san Eoraip.

Ó thaobh chúrsaí sabháilteachta de, ghnóthaigh an T250 cúig réalta sa Euro Ncap – eagras atá i mbun scrúduithe sabháilteachta san Eoraip agus a chuireann in iúl don chustaiméir cé chomh slán agus atá na gluaisteáin ar fad atá ar fáil ar an Mór-Roinn.

Faigh Ceann Díosail

Má tá tú ag smaoineamh ar Avensis athláimhe a cheannach, molaim go mór duit dul le díosal. Baineann Avensis úsáid as córas darb ainm D-4D. Tá an cineál seo innill go maith toisc go dtiomáineann sí mar ghluaisteán artola. Ní hamháin sin, ach tá an D-4D níos feidhmiúla ó thaobh breosla de – dónn sí níos lú dé-ocsaíd charbóin (CO2).

Is féidir brath ar an Avensis – agus is léir seo ón méid acu atá le feiceáil ar bhóithre na tíre seo agus ar bhóithre tíortha éagsúla eile ar fud na cruinne. Tá a fhios agat gur féidir brath uirthi chomh maith mar gheall ar an méid acu a bhíonn in úsáid ag tiománaithe tacsaí! Cé gur féidir muinín a bheith agat as an T250, rinneadh athghlao ar chuid acu i mí Aibreáin na bliana seo – .i. carranna a tógadh idir na blianta 2000 agus 2004 – mar gheall ar fhadhb leis an mála aeir.

Tá taighde déanta agam féin ar an T250 le tamall anuas agus bhí sé deacair teacht ar fhadhbanna coitianta a bhaineann léi, ach seo chugaibh roinnt de na fadhbanna ar tháinig mé orthu (ar fhaitíos go mbeadh spéis agat ceann a cheannach). An chéad fhadhb choitianta a bhaineann léi ná go dtógann sé tamall rófhada dínéalú a dhéanamh ar na fuinneoga. Bíonn roinnt tiománaithe ag gearán faoin gcóras aerchóirithe san Avensis T250 freisin. Agus deir cuid acu gur féidir fadhbanna a bheith ag baint leis an bpríomhghaiscéad san ineall 2.2 díosail. Deirtear go dtarlaíonn an fhadhb seo ag thart ar 45,000 míle. Rud amháin eile – agus ní fadhb é seo ach rabhadh – má tá tú ag smaoineamh ar díosal a cheannach, faigh amach ar athraíodh an bheilt-tiomáint tar éis 60,000 míle (agus gach 60,000 míle ina dhiaidh sin). Bíonn slabhraí in úsáid sna hinnill pheitril – mar sin, ní gá a bheith róbhuartha fúthu siúd.

Sásúil

Seachas na rudaí thuas luaite ní raibh mé abálta teacht ar mhórán fadhbanna coitianta eile. Nach maith an rud é sin! Ar ndóigh, braitheann an-chuid ar cér leis/léí an carr atá ar díol. Le críochnú, measaim gur carr ar féidir brath uirthi í an Avensis T250. Tá a fhios agam gur tharla roinnt athghlaonna le tamall anuas, ach fós féin is carr í atá tógtha go han-mhaith. Níl an taobh istigh den charr rótharraingteach, ach ní ligfinn dó sin chur isteach orm ceann a cheannach.

Má tá tú ag smaoineamh ar cheann a cheannach seo chugat na meánphraghasanna don Avensis T250.

• 2006: €4,500-€8,000
• 2007: €5,500-€10,000
• 2008: €7,000-€12,000
• 2009: €8,500-€13,500