Ní rómhinic a fhógraítear na laethanta seo an méid airgid a chaitear ar theach a thógáil. I ndiaidh a bhfuil fulaingthe ag an oiread sin daoine ar mhargadh na dtithe in Éirinn nuair a thit an tóin as, ní rud cuibhiúil é a bheith ag déanamh mórtais as an mhéid a chaith tú ar theach.

Ach tá Frank Buckley, ealaíontóir dífhostaithe i mBaile Átha Cliath ag dul in aghaidh an tsrutha leis an teach a thóg sé le €1.4 billiún. Cad é sin? a deir tú - ealaíontóir dífhostaithe agus é ag tógáil tí ar airgead mór? Ní thiocfadh le sin a bheith ceart... Cá bhfaigheadh a leithéid airgead mar sin? Ar robáil sé banc? Ar tugadh clúdach ollmhór donn dó?

Leis an rúndiamhair a dhéanamh níos rúndiamhaire arís, is féidir a rá go bhfuair sé an t-airgead díreach amach as Banc Ceannais na hÉireann agus cead ar leithligh aige ón bhanc sin é a úsáid. Thosaigh scéal aisteach Frank Buckley mar a thosaigh scéalta a lán daoine ag an am, nuair a cheannaigh sé teach ar €365,000. Shíl sé, mar a shíl a lán eile cosúil leis, go raibh margadh maith déanta aige, agus deimhníodh an tuairim sin dó nuair a d’éirigh leis iasacht airgid a fháil óna bhanc gan mórán stró, ainneoin nach raibh fostaíocht leanúnach aige ag an am. Bhí muid ag maireachtáil i saol craiceáilte a bhí á stiúradh ag tíogar buile, mar a dúirt sé féin. Sa deireadh, nuair a tharla an t-ollchliseadh geilleagair, b’éigean do Frank a theach a thabhairt suas agus dul sa tóir ar áit níos lú.

Amhábhar Luachmhar

Is ansin a rith an smaoineamh leis go dtógfadh sé áit agus go mbainfeadh sé feidhm as ábhar tógála an-neamhchoitianta – brící déanta de nótaí euro bainc a díchoimisiúnaíodh agus a stialladh. Thosaigh an togra treallúsach seo i Mí na Nollag 2011 agus tá árasán tógtha aige taobh istigh de phóirse ceap oifigí atá folamh le ceithre bliana. Tá ballaí an árasáin déanta le brící den amhábhar an-luachmhar seo (a bhfuil a luach stiallta as) agus tá gach bríce thart fá 15 x 6 cm agus tá idir 40- 50 nóta euro i ngach ceann acu. Tá trí sheomra tógtha aige go dtí seo; seomra leapa, seomra folctha agus seomra suí le go leor slí fá choinne taispeántas ealaíne a chur ar siúl ann. Tá sé i gceist aige cistín a chur leis amach anseo agus deir sé go raibh an t-árasán breá teolaí nuair a bhí an aimsir go dona i rith an gheimhridh.

Is suimiúil an léargas atá le fáil sa togra seo ar na féidireachtaí a bhaineann le athchúrsáil earraí agus ní gá €1.4 billiún a bheith agat le teach a thógáil atá saor agus inglactha ó thaobh cúrsaí timpeallachta de.

Tá treoir le fáil sa suíomh idirlín housesofthefuture.com ar an chineál amhábhair a ndéanfar tithe as amach anseo. San Astráil faoi láthair, mar shampla, tá tithe sómasacha daingne á ndéanamh as 85% de chairtchlár agus earraí athchúrsáilte eile.

Ar an dóigh chéanna, úsáídeann an t-ailtire Nua-Mheicsiceach, Mike Reynolds, seanbhoinn chairr, cré agus cannaí alúmanaim i ndearadh a chuid tithe nuálacha. Tá na tithe ciorclacha seo déanta as rubar agus cré agus úsáidtear cannaí agus buidéil lena maisiú. Baineann sé úsáid as painéil gréine mar fhoinse teasa chomh maith le spásanna grianmhara le lusanna a fhás.

Má shíleann tú go bhfuil sé sin i bhfad róchasta, cuimhnigh ar John Malkovish as Houston Texas a tháinig ar bhealach cruthaitheach lena chuid seanchannaí beorach a athchursáil: shocraigh sé teach a thógáil leo. D’ól sé sé channa sa lá ar feadh 18 mbliana agus nuair a bhí an 39,000ú canna beorach ólta aige, bhí an teach tógtha aige!

Ach tá bior ealaíonta ar leith ar thogra Frank Buckley. Ní hamháin go bhfuil áras cónaithe éiceolaíoch tógtha aige, tá meafar cliste buan cruthaithe aige as an ábhar a bhí agus atá ina ábhar crá agus buartha ag mórán de phobal na tíre seo go fóill.