Tar éis mo choicíse saor ó theicneolaíocht tá iota tarta orm arís. Ní raibh mé ag súil leis an mbriseadh seo ón teicneolaíocht i mbliana ó bhí mé ag taisteal go hiarthar Chorcaí is Chiarraí ach idir easpa aibhléise (ag campáil a bhí mé) agus easpa rochtain idirlín, ní raibh an dara rogha agam. Toradh amháin is ea go dtuigim anois a dhonacht is atá gnóthaí rochtana idirlín 3G in áiteanna ar leith agus braithim ciontach faoin ráiméis a bhí mé ag caitheamh ‘síos na píopaí’ chugaibh sna ceantracha úd. (Ar feadh cúpla nóiméad. Tá mé tagtha ar ais chugam féin arís.) Dála an scéil, tá an freastal ar fheabhas ar fad ar an mBlascaod Mór: b’fhéidir gur fiú smaoineamh faoi comhphobal a bhunú ann arís…

Ceann de na gnéithe ar chuir mé an-spéis ann in Ionad an Bhlascaoid Mhóir ná an t-eolas ar fad faoi conas a mhair muintir na mBlascaod in áit chomh garbh is eascairdiúil: na sonraí beaga faoi obair tí is iascaireachta, faoi chúram ainmhithe agus faoi thograí móra ar nós tógáil curaigh. Ní raibh an dara rogha acu ach a bheith tionscantach agus cúramach leis an trealamh a bhí ar fáil.

Éilíonn Caoi Ruda Caoi Ruda Eile

Is muid ag campáil le linn an tsamhraidh, b’éigean dúinn a bheith tionscantach go maith is muid ag ullmhú beilí. Ní bhíonn linn ach na huirlisí bunúsacha agus sorn amháin i bhfoirm Trangia. Le máthair is athair ag obair go lánaimseartha agus mé ag fás aníos i dteaghlach seachtair, tógadh sinn ar ‘iontais an aon phota’ mar a thugtar air i mBéarla. Mar sin tá stór mór oideas agam de ghlanmheabhair. Ach de ghnáth, bhíodh cuisneoir agus gríoscán agus brúbhruthaire agus uirlisí ar fad na cistine in aice láimhe agus ar bharr mo mhéar agam. Ní bhíonn ach an t-aon sorn agam nuair a bhímid i mbun campála.

Mar a bhíonn ar saoire, is é a laghad iarrachta agus níocháin a bhí uainn i gcónaí nuair a bhí mé ag fás aníos. I gcodarsna leis an méid sin, ba bhean díomhaoin gan chlann í mo mháthair bhaiste a bhíodh ag obair d’Aer Lingus agus a rinne an-chuid taistil dá bharr. Gach uair a dtagadh sí abhaile as na Stáit Aontaithe, bhíodh giuirléid cistine (dochreidte!) nua aici dúinn. Bhíodh sí i gcónaí ag iarraidh saol crua mo mháthair a éascú. Is cuimhin liom go maith an croíghearrthóir agus an slisneoir úill, na slísneoirí cáise is uibhe, na boscaí sábháil bia, na leabhair nótaí, eagraitheoir béiltí is liostaí bia.

Le teacht Kickstarter is a macasamhail, tá áit ann don aireagóir giuirléidí cistine agus níl mórán cúthaileachta orthu. Le Dragon’s Den agus a macasamhail, tá ardán ann fiú dóibh siúd nach spéis leo Kickstarter. Bíonn craic ina leithéid ar an teilifís: bíonn cuid díom ag déanamh iontais faoi shaontacht na n-aireagóirí, go gcreidfeadh siad go n-éireodh lena ngiuirléid. Tá an chuid eile díom ag déanamh iontais faoin saghas ruda a cheannódh duine is a leisciúla is atá daoine nach bhfuil sásta cúpla nóiméad breise a chaitheamh le píosa oibre, go gcaithfidh siad slisneoir úill a fháil, fágaim. Ach, le cothrom na féinne a thabhairt don tomhaltóir samhlaíoch seo, ní am ná iarracht atá na giuirléidí seo go léir ag sábháil: tá roinnt dóibh ag oscailt doirse ar fhéidearthachtaí nua go hiomlán.

Liosta le hÁireamh

Seo chugaibh anois liosta den deich gcinn de ghiuirléidí cistine is mór agam ar an idirlíon. Seolaim nóta buíochais chuig eagarthóir Beo...

Cén fáth nach mbíonn ach ubh amháin ag an nGaeilgeoir ar maidin? Because the egg is an ubh. Oibríonn sé rud beag níos fearr i bhFraincís. Má thaitníonn uibheacha go mór leat ach tá tú bréan d’uibheacha bruite, friochta, scallta agus scrofa, seo anois giúirléid a dhéanfas úbh órga duit. Coolest Gadgets

Gach seans go mbeidh ‘saighdiúirí’ de dhith ort le gabháil leis an ubh úd ach rinne tú glan dearmad an t-im a thógáil as an gcuisneoir aréir agus anois tá sé chomh crua leis an iarann. Ná bí buartha, tá réiteach sa ‘Stupendous Splendiferous Butter Up’. Seo scian speisialta a éascaíonn an turas ó im crua go him bog is é á smearadh ón gceap ime go dtí an t-arán. Kickstarter

Ach b’fhéidir nach bhfuil na saighdiúirí sin spéisiúil go leor duit an chéad rud ar maidin. B’fhéidir go bhfuil arán ruaimnithe uathúil uait? Cuir fáilte roimh Toasted Selfies! Seo tóstaer leictreach a gcuirfidh aon phictiúr, mana, nó feathal is mian leat ar an tósta. Is féidir íomhánna éagsúla a chur ar dhá thaobh an tósta fiú. Ar $75.00 seo bronntanas foirfe do lanúin nuaphósta: beidh siad nuatósta le seo. (An bhfuil Gaeilge ar bah dum dum shh?)

Maith dom an t-imeartas focail gan náire sin. Tá sé luath ar maidin, an dtuigeann tú? Nílim ach leath bealaigh trí chupán tae. Anois dá mbeadh Barisieur agam ní hamháin go mbeinn lán le caiféin faoin am seo ach bheadh trealamh galánta in aice mo leaba. Tá rud éigin rud beag Mad Men, rud beag todhchaí na caogaidí faoin bhfearas caife seo. Teasmade le stíl.

Braon ‘sa Ghrágán’

Is ag faoi Mad Me, más óltóir uisce bheatha tú b’fhéidir go mbeadh spéis agat i Whiskey Blocks. Cinnteoidh na cúibeanna beaga seo go bhfanfaidh do dheoch fuar ach go bhfanfaidh tú úr leis agus fearúil nó ar a laghad Fred Flinstone-úil...

Gach seans go bhfuil sé róluath fós chun deoch mheisciúil a phlé agus go bhfuil tú fós ag smaoineamh faoin gcaife sin a luaigh mé níos luaithe. Ach b’fhearr leat muga uathúil dod’ chaife. Tá réiteach agam duit! Ligfidh an Build-on Brick Mug do rogha Lego macasamhail a chur leis chun muga ar leith a chruthú. Athchruthaigh troid Vader is Skywalker ar thaobh do chupán; cuir rotha ar do chúpan is tabhair leat é trasna na cistine nó chuig an mbord cruinnithe. Casfaidh sin cloigeann nó dhó ar nós Bad Cop/ Good Cop sa Lego Movie fiú.

Ná bí buartha má dhoirteann tú an caifé sin: tá an Towlhub ann chun tuáille cistine a dháileadh amach. Gach seans go bhfuil coinneálaí tuáille cistine agat cheana ach an féidir leat do chuid uirlisí aibhléise a athluchtú ar do choinneálaí tuáille cistine? Ní féidir? Conas a mhair tú go dtí seo? (Cé go bhfuil mé ag magadh faoin uirlis cistine seo tá cuid díom ag smaoineamh faoi cé chomh háisiúil is a bheadh sé…)

Dála an scéil, an bhfuil fhios agat go bhfuil soicéad le USB chomh maith le háit do ghnáthphluga ar an mhargadh? Ní don chistin amháin é seo ar ndóigh ach bheadh sé úsáideach ann.

Dá mbeadh clár mionghearrtha iPad agat, bheadh a leitheid de shoicéad an-úsáideach ar fad. Cinnte, is féidir a leitheid de chlár mionghearrtha a fháil: tá riar maith díobh ar fáil. Go pearsanta, is maith liom an ceann ó CTA Digital mar tá spás idir an iPad is an scian agus an bia ar fad.

Mar sheachfhocal beag ar an bhféidearacht sin, bhí tuiscint ar leith ag an bhfear seo faoina chlár mionghearrtha iPad https://www.youtube.com/watch?v=R6WuHzE-1fk

Is ag scríobh faoi rudaí a ghearradh tá an-chuid sútha talún gearrtha agam i rith an tsamhraidh seo - táim pósta le Carmannach. Sin ráite, níor smaoinigh mé riamh gur chóir dom bainteoir gais sú talún a fháil ach táthar ann má tá siad uaitse. http://www.amazon.com/Chefn-StemGem-Strawberry-Stem-Remover/dp/B002XOHZWC/

Muna bhfeabhasaíonn na huirlisí is giuirléidí sin ar fad do shaol iad féin, tá súil agam gur chuir siad meangadh ar do bhéal. Is mé ag tabhairt faoin taighde don alt seo thug na giuirléidí áiféiseacha seo le tuiscint dom nach gcruthaíonn an gá ach crá inár gcroí agus gur chóir dúinn sásamh a fháil sa mhéad atá againn inár saol cheana. Ní líonfaidh bainteoir gais sú talún poll ar bith i do shaol.