Ócáidí pléisiúrtha, spraoiúla sa chuid is mó - Carnabhal Rio, Notting Hill, Lá na Féile Pádraig i Nua-Eabhrac, Mardi Gras agus an Walt Disney World Christmas Day Parade.

I dtuaisceart na hÉireann, tá mórshiúlta na nOrd Dílse againn, cuid acu a cheiliúrann bua an Rí Liam ar an Rí Séamus 319 bliain ó shin, cuid eile a cheiliúrann an Protastúnachas agus dílseacht do Mhonarcacht Shasana. Níl rud ar bith cearr leis sin go teoiriciúil ar ndóigh, ach b’ionann riamh anall, cuid bheag de na mórshiúlta seo agus achrann, foréigean (http://www.youtube.com/watch?v=Qlt6RGYvgo&NR=1) agus crá croí dóibh sin nach Protastúnaigh iad. Tá ceist na mórshiúlta i mbéal an phobail arís agus ceangal déanta ag an DUP le haistriú cumhachtaí cirt agus póilíneachta go Tionóil Thuaisceart Éireann. Tchí Dia sinn. (http://www.youtube.com/watch?v=MSfB5WjfuU)

Mar atá a fhios ag an saol mór – tá súil agam - níl ach cuid bheag de na mórshiúlta, corradh le 3,000 acu gach bliain, a tharraingíonn conspóid ar bhonn rialta. Tarraingíonn siad conspóid mar go dtéann siad thrí cheantair nach mbíonn fáilte rompu. (http://www.youtube.com/watch?v=rjzGZxRcRWA&feature=related) (http://www.youtube.com/watch?v=7Z2jsWoDZmc&feature=related) (http://www.youtube.com/watch?v=qjXq1UaQIgk&feature=related) (http://www.youtube.com/watch?v=y0zNMBL6tFg&feature=related) (http://www.youtube.com/watch?v=JuFuJ262pnY&feature=related)

Cothroime do Chách

Is furasta an scéal a réiteach. Suíodh ionadaithe an Oird agus ionadaithe na n-áitritheoirí síos le chéile agus oibríodh siad amach cén bealach is fearr a bheadh oiriúnach don dá dhream. Is éigean seo a dhéanamh ar bhonn logánta. Nuair a theipfidh ar na chéad idirbheartaíochtaí, tosófar as an úr. Agus arís. Agus arís go dtí go n-aimseofar socrú cothrom do chách. Ní eolaíocht diúracáin atá ann. Bhí sé de sprioc ag Aontachtaithe riamh anall fáil réitithe de Choimisiún na Mórshiúlta. (http://www.paradescommission.org/) Tá fáilte curtha roimh mholta Athbhreithniú Straitéiseach ar Mhórshiúlta a bhfuil an polaiteoir Sasanach Paddy Ashdown ina chathaoirleach air mar go gcreidtear go gcuirfidh an tAthbhreithniú deireadh leis an Choimisiún. (http://www.youtube.com/watch?v=TD_1Nar7hsY) Ach tá Sean Murray, fear ar cuireadh ina leith go raibh sé ar Chomhairle Airm an IRA, ina bhall den choiste Athbhreithnithe. (http://www.youtube.com/watch?v=3c9lUvn5qC8) Ní mholfaí a dhath nach mbeadh bá Shinn Féin leis nó nach mbeadh an páirtí Sinn Fein ábalta bá a lucht vótála a fháil ar a shon.

Measaim féin nach mbeadh Sinn Féin chomh buartha sin uilig fá scor Choimisiún na Mórshiúlta, d’ainneoin a bhfuil ráite acu. Ná déan dearmad gur ghlac an Coimisiún cinnidh - go háirithe maidir le mórshiúl Ard Eoin - nach raibh náisiúnaigh sásta leis agus is cinnte go mbeidh cearta na n-áitritheoirí aitheanta i cibé eagraíocht nó córas a thiocfaidh mar chomharba ar an Choimisiún.

Brú ón Dá Imeall

Cén fáth mar sin go bhfuil an bac nua seo tógtha ag Robinson ar fhuascailt fhadhb aistriú cumhachtaí póilíneachta agus cirt?Freagra: An TUV, the True Unionist Voice de chuid Jim Allister.Arís eile, tá brú á chur ag dreamanna an imill - an TUV ar an taobh aontachtach agus easaontóirí ar thaobh na náisiúnach - ar na páirtithe atá i gcumhacht. Ach an bhfuil an pobal aontachtach chomh truamhéileach sin gur tábhachtaí leo an tOrd Oráiste a fheiceáil ag siúl ar Bhóthar Gharbhachaidh ná smacht a bheith ag a chuid ionadaithe ar chúrsaí póilíneachta agus cirt?

Agus an bhagairt atá ag teacht ó easaontóirí Poblachtanacha ag méadú lá i ndiaidh lae, an é an chloch is mó ar a bpaidrín (cor cainte mífhóirsteanach, is dócha) cosa Oráisteacha i gceantracha Caitliceacha? In amanna, cailleann focal nó nath cainte brí má bhaintear barraíocht feidhme as. Sin mar atá “Community Confidence” Pheter Robinson. Cad é mar a thógfaidh scor Choimisiún na Mórshiúlta muinín aontachtach?

Faoi láthair tá tuairim ar 35,700 ball den Ord (i 1948, bhí 76,500 ann). Is ionann 37,500 agus 2.3 faoin chéad de dhaonra Thuaisceart Éireann. Tá fuath ag cuid den phobal Protastúnach ar an Ord. An bhfuil todhchaí shíochánta an réigiúin ag brath ar dhiongbháilteacht na heagraíochta rúnda seo siúl thrí cheantracha nach bhfuil fáilte rompu agus crosadh atá á thabhairt dóibh ag Peter Robinson ar aon dul chun cinn ar réimsí eile polaitíochta? Is furasta a chreidbheáil.

Mar a thug scríbhneoir an bhlaig 3000 Versts of Loneliness faoi deara agus é ag scriobh fá bhaill an DUP: “Tá feachtas Ian McCrea ann le cosc a chur ar an Phápa theacht go Tuaisceart Éireann; ráitis lánfuatha Iris Robinson fá dhaoine aeracha; séanadh Sammy Wilson go bhfuil baint ag an chine daonna le hathrú aeráide; Edwin Poots agus a mhacasamhail a chreideann nach bhfuil an domhan ach 5000 bliana d’aois; Jim Wells atá in éadan wifi ...”

Labhair Gregory Campbell ar son phionóis an bháis an tseachtain seo. Cén fáth mar sin gurbh ábhar iontais go bhfuil siúlóidí Oráisteacha ina thosaíocht ag an DUP i mbliain seo an drochshaoil 2009?