Bíonn sé deacair scaití mórán brí a bhaint as an stuif a dtugann na meáin san Astráil nuacht agus cúrsaí reatha orthu. Baineann sé sin go háithrid leis na stáisiúin teilifíse. Ar ndóigh, bíonn béim acu ar rudaí a bhaineann leis an Astráil nó le hAstrálaigh thar lear.

Ní hábhar iontais é sin. Ach tá bealaí lena dhéanamh. Is minic tuairisc cloiste agam ar rás nó comórtas luthchleasaíochta san Eoraip, cuir i gcás, áit a ndeirtear linn go raibh Astrálach sa seachtú háit. Luaitear an t-ainm ach ní deirtear cé a ghnóthaigh, gan trácht ar an dara nó an tríú háit. Bheadh amhras ort ar éirigh le duine ar bith an comórtas a ghnóthú.

Go minic fágtar rudaí ar lár. Bhí clár “nuachta” uair an chloig ar stáisiún teilifíse amháin (Channel 10) an lá tar éis an reifrinn sa bhFrainc faoi bhunreacht an Aontais Eorpaigh. Ní raibh tagairt ar bith don reifreann ná don toradh a bhí air. Ar an stáisiún céanna i 1991 bhí an botún nuachta ba mhíchruinne a chuala mé riamh. Ag deireadh na bliana thug siad liosta de dhaoine cáiliúla a cailleadh i rith na bliana. Ina measc siúd bhí Yuri Gagarin. Ach cailleadh Gagarin i dtimpiste eitleáin i 1968. Bhí sé de dhásacht ag an stáisiún céanna a rá tamall ina dhiaidh sin nach mbíonn aon bhotúin acu ina gcuid scéalta nuachta.

Bhí cúpla deis acu le tamall anuas dul thar fóir agus thapaigh siad an deis. Bhí Schapelle Corby, bean as Queensland, ar a triail i mBali de bharr marijuana *a thabhairt léi as an Astráil (féach *Beo!, Bealtaine 2005). Chaith péire de na stáisiúin teilifíse trí uair an chloig ag cur an bhreithiúnais i láthair. Is éard a bhí ann go bunúsach triúr breithiúna ag léamh an bhreithiúnais i mBahasa, teanga nach bhfuil ach ag corrdhuine san Astráil.

Nuair a gearradh téarma 20 bliain uirthi, ní raibh sé i bhfad go raibh na meáin ag gríosú na ndaoine agus ba léir gur dearcadh ciníoch ba bhunús le cuid mhaith de na tuairimí a bhí le cloisteáil. Mhol daoine baghcat a dhéanamh ar thaisteal go Bali agus d’iarr daoine eile airgead ar ais a tugadh tar éis an tsúnámaí i mí na Nollag. Níl sé soiléir cén fáth ar tugadh an oiread sin airde ar an gcás sin nuair a dhéantar neamhshuim d’fhormhór na 150 cás eile a bhaineann le triail Astrálach thar lear.

I gcás eile an mhí seo caite ligeadh saor Douglas Wood a gabhadh san Iaráic 47 lá roimhe sin. Nuair a tháinig sé ar ais go dtí an Astráil bhí preasócáid aige féin agus ag a mhuintir i Melbourne ach ní raibh mórán le rá aige faoin méid a tharla dó. Bhí cúis leis. Bhí an scéal díolta aige go heisiach le stáisiún teilifíse amháin. Ceaptar gur íocadh idir $250,000 (€150,000) agus $400,000 ar an scéal. Bhí na meáin eile ar buile, ag clamhsán faoi “iriseoireacht an tseicleabhair”, rud a bhíonn ar siúl acu féin nuair a fheileann sé.

Ní bheidh sé i bhfad go mbeidh deis acu filleadh ar scéal Corby - beidh achomharc ar siúl faoi cheann cúpla mí. Is cinnte go súfaidh na meáin chuile dheoir as an scéal sin.

Tá Dáithí Ó Colchúin ina chónaí i Sydney. Is as an gCeathrú Rua i gConamara ó dhúchas é.