Tá lóistíní Leaba agus Bricfeasta mar chuid lárnach de thionscal turasóireachta na tíre seo le fada an lá anois. Tá na lóistíní seo mealltach do chuairteoirí mar nach bhfuil a macasamhail le fáil i mórán tíortha eile. De réir na dtuairiscí, áfach, níl ag éirí go rómhaith leo siúd atá ag obair san earnáil Leaba agus Bricfeasta, i mbliana go háirithe; deirtear go bhfuil deacrachtaí dosháraithe acu agus go rachaidh sé dian ar go leor acu leanúint ar aghaidh i bhfad eile leis an ghnó.

Ní ábhar iontais é seo, ar chúpla cúis. Ar an chéad dul síos, tá na mílte seomra breise curtha ar fáil ag na hóstáin timpeall na tíre le dornán blianta anuas; tá i bhfad barraíocht seomraí ar fáil i ndáiríre agus bíonn scéalta le cloisteáil go rialta faoi óstáin i mbailte tuaithe bheith ag díol a gcuid seomraí ar phraghas an-íseal – is cuma le go leor acu, a fhad is go dtig leo na leapacha a líonadh. Bíonn úinéirí na n-óstán sásta má íocann táillí na seomraí leapa pá na n-oibrithe; bíonn na cuairteoirí ag ithe agus ag ól sna hóstáin, agus gineann sé seo ioncam breise nach mbeadh ar fáil dá mbeadh na seomraí folamh.

Lena chois sin, tá an saol athraithe go mór le fiche bliain anuas. Is dócha gur féidir a rá go bhfuil níos lú cumarsáide i measc daoine na laethanta seo; tá daoine i bhfad níos príobháidí ina saol agus, go minic, ní bhíonn fonn dá laghad orthu comhrá a dhéanamh le bean tí faoi cé as a bhfuil siad tar éis a theacht nó cá bhfuil a dtriall. Chomh maith leis sin, cuirtear réimse áiseanna agus seirbhísí ar fáil sna hóstáin nach bhfuil le fáil i lóistíní eile agus is cinnte go dtugann sé seo buntáiste an-mhór dóibh.

Tá Príomhfheidhmeannach eagraíocht lucht Leaba agus Bricfeasta, Town and Country Homes, tar éis straitéis nua a fhorbairt a bhfuil sé mar aidhm aici an earnáil sin a shábháil, agus tá súil ag go leor daoine go n-éireoidh léi mar straitéis. Deir Alan Hill gurb é an bealach chun tosaigh ná margaíocht a dhéanamh ar lóistíní Leaba agus Bia mar chuid de phacáistí siúil, iascaireachta agus saoire tuaithe. Tá féidearthachtaí ag baint leis an straitéis seo, gan amhras, ach is cinnte go bhfuil infheistíocht mhór de dhíth le caighdeán na n-áiseanna a fheabhsú, chun cuairteoirí a mhealladh ó na hóstáin, lena sólanna agus linnte snámha.

Tá súil againn go n-éireoidh le Town and Country Homes an chuid seo de thurasóireacht na tuaithe a choinneáil slán. Is boichte a bheas muid má theipeann ar an earnáil.