Níl acmhainn ghrinn sa Mhoslamach, nó ar a laghad, ba mhaith le daoine áirithe go gcreidfeá sin. Cosúil le conspóid chartún na Danmhairge, thug an “carrbhuama” i Times Square deis iontach dóibh siúd ar mhian leo drochíomhá d’Ioslam a chruthú.

Thug go leor de na tuairiscí luatha le fios go mb’fhéidir go raibh baint ag an eachtra le South Park, an scigchlár beochana teilifíse, ós rud é gur páirceáladh an SUV, líonta le leasachán neamhphléascach, thart ar bhloc ó cheanncheathrú Viacom ar leis Comedy Central. Nuair a chraoladh mír de South Park i mí Aibreáin inar léiríodh Mahamad i bhfeisteas mathúna, nó béir, d’eisigh dream i Nua-Eabhrac darb ainm Revolution Muslim bagairtí báis indíreacha do chruthaitheoirí an chláir. Zachary Adam Chesser, a thugann Abu Talhah al-Amrikee air féin anois, a scríobh an bhagairt ar shuíomh gréasáin na buíne.

Cúpla lá ina dhiaidh sin, rinne Joshua Rhett Miller, iriseoir le FoxNews.com, scéal faoin bhagairt, inar chuir sé agallamh ar Chesser. “They’re going to be basically on a list in the back of the minds of a large number of Muslims,” a dúirt an fear óg a d’iompaigh ina Mhoslamach radacach le deireanas. “It’s just the reality.”

Níorbh é seo an chéad uair a phoibligh meán de chuid Rupert Murdoch, tacadóir mór le hIosrael, ráiteas gríosaitheach de chuid Revolution Muslim.

Daniel Pearl, Iriseoir

Ar 28 Márta, 2008, thuairiscigh FoxNews.com ar an dráma puipéad seafóideach a láithrigh an cumann faoi dícheannadh Daniel Pearl, iriseoir Giúdach ó Mheiriceá a dúnmharaíodh sa Phacastáin i 2002. “I could care less about Daniel Pearl,” a dúirt bunaitheoir na buíne, Yousef al-Khattab, in agallamh le Fox. “I’m happy to see that he’s gone.”

Ar 13 Deireadh Fómhair, 2009, tharraing Joshua Rhett Miller aird ar “phaidir” a scríobh al-Khattab inar impigh sé ar Dhia na Giúdaigh a mharú. In agallamh eile le Fox, mhaígh al-Khattab gurb é seo “paidir gach fíor-Mhoslamach.”

Ar 8 Mí na Samhna, 2009, thuairiscigh Fox nuair a thug Revolution Muslim ómós do Maj. Nidal Malik Hasan, an síciatraí de chuid arm SAM a cúisíodh as 13 duine a mharú i Fort Hood, Texas. Ba é an New York Post, nuachtán eile de chuid Murdoch, a chuir agallamh ar al-Khattab an uair seo i ndiaidh dó scríobh: “An officer and a gentleman was injured while partaking in a pre-emptive attack. Get well soon Major Nidal. We love you.”

Cohen » Al-Khattab

In alt amháin dá chuid, luann Miller gur mar Giúdach darb ainm Joseph Cohen a rugadh al-Khattab, agus gur iompaigh sé ina Mhoslamach tar éis freastal ar scoil raibíneach Ceartchreidmheach. Sonra neamhthábhachtach?

Scéal áiféiseach is ea é iompú Cohen a hinsíodh sa Jerusalem Post i mí na Samhna, 2005. Cuireadh agallamh ar thriúr Iosraelach, Cohen ina measc, le haghaidh gné-alt nuachta dar teideal “True Believers” faoi inimircigh a d’iompaigh ina Moslamaigh.

Fad is a bhí sé ina chónaí i Netivot – an baile is ceartchreidmhí in Iosrael – mhaígh Cohen gur éirigh sé bréan de bheatha thuata na tíre. Thart ar an am sin, dúirt sé gur chas sé le síc as Aontas na nÉimíríochtaí Arabacha ar an Idirlíon. Tar éis dhá bhliain i mbun “dialóige diagaí” leis an tsíc áititheach, d’iompaigh Cohen thar oíche ó bheith ina thacadóir do Shas – páirtí chiníoch na nGiúdach Ceartchreidmheach Oirthearach – le bheith ina thacadóir ag Hamas agus al-Qaeda.

Ach bhí Moslamaigh na Pailistíne “lag,” dar leis, mar nár thug siad mórán airde ar Ioslamachas “íon” dá chuid féin. D’fhill sé ar a chathair dhúchais, Nua-Eabhrac, go luath ina dhiadh sin, áit ar chuir sé tús lena jihad ar an líon le Cailifeacht Mhoslamach a chruthú ar fud an domhain.

Ní fada ó chreid Cohen gur thug Dia an Phailistín do na Giúdaigh. Anois tá sé á rá gur chóir go mbeadh na Moslamaigh i gceannas ar an domhan.

Dúthracht an iompaitheora? B’fhéidir.

Ach daingníonn sé chomh maith bolscaireacht frith-Ioslamach de chuid leithéidí Daniel Pipes ar mhaith leo Meiriceánaigh a scanrú roimh Ionradh na Moslamach ionas go dtroidfidh siad cogaidh ar son Iosrael.