Antaine Ó Faracháin: A Mháire, inis dom ar dtús: cén uair a bheas Ceardlann Earraigh ar siúl?

MUíF: An t-ochtú lá de mhí an Aibreáin. Bíonn na ceardlanna lae ar siúl i Scoil na Mainistreach i gCill Droichid. Bíonn na ranganna ar siúl ansin i rith an lae agus ansin tráthnóna tagann na múinteoirí ar fad le chéile agus bíonn coirm cheoil mhór againn. Bíonn sí sin ar siúl i Má Nuad, in Óstán an Glenroyal.

AÓF: Cé chomh fada is atá an cheardlann seo ag tarlú anois?

MUíF: Sílim gurb í seo an naoú bliain anois. Tá na blianta ag imeacht go sciobtha!

AÓF: Agus an gceapann tú go bhfuil sí ag fás nó ag fanacht mar an gcéanna?

MUíF: Ó tá sí ag méadú i gcónaí, ach tá a lán oibre i gceist. Caithfidh tú rudaí a dhíol i gcónaí. Ní raibh an méid sin múinteoirí againn ar dtús, ní raibh an méid sin uirlisí i gceist. Bhí an bosca ceoil, an veidhlín, bhí na rudaí sin ann, ach ní raibh an bainseó againn, abair. Tá an chruit againn i mbliana freisin. Ní raibh an bodhrán againn ar dtús ach an oiread.

AÓF: Thosaigh sibh beag go leor ag an tús.

MUíF: Thosaigh. Ach táimid ag iarraidh a bheith ag fás.

AÓF: Agus gan éirí rómhór ag an am céanna.

MUíF: Bhuel, ní fhéadfadh muid éirí rómhór, mar tá a lán oibre i gceist cé nach bhfuil ann ach lá amháin.

AÓF: Bím ag ceapadh go minic nach dtuigeann daoine an méid oibre a bhíonn i gceist le rudaí mar seo a chur le chéile.

MUíF: Breathnaíonn sé mar sin ar an oíche; á, muise, thit sé sin amach. Ach ní tharlaíonn aon rud gan obair.

AÓF: Cé eile atá ag obair leat ar an gcoiste?

MUíF: Nuala Keane, Nóirín Ní Shúilleabháin agus Seán Mac Gearailt.

AÓF: Inis dom a Mháire, cé hiad na ceoltóirí a bheas agaibh i mbliana?

MUíF: Bhuel, beidh John Regan ar na mbosca ceoil; Noel Hill agus Séamus Ó Mongáin ar an gcansairtín; Louise Mulcahy agus Sarah Jane Woods ar an bhfeadóg mhór; Mícheál Ó Briain ar an bpíb uilleann; Tadhg Ó Meachair ag plé leis an amhránaíocht; Bríd Harpur, Liam Ó Conchubhair agus Kathleen Nesbitt ar an bhfidil; Marcus Maloney ar an mbainseó; Méabh Ní Lochlainn agus Michael Tubridy ar an bhfeadóg stáin; Michelle Mulcahy ar an gcruit agus Junior Davey ar an mbodhrán.

AÓF: Agus ansin tá damhsaí agaibh freisin nach bhfuil?

MUíF: Tá Rita Doyle ag teacht chuig an gceolchoirm lena cuid damhsóirí seite óga agus beidh Maureen Culleton i mbun ceardlainne ar dhamhsaí beirte i rith an lae.

AÓF: Tá scoth na gceoltóirí faighte agaibh.

MUíF: Tá. Beidh an-choirm cheoil ann, le cúnamh Dé. Beidh na ranganna ag tosú ag 11am i Scoil na Mainistreach i gCill Droichid agus beidh an choirm cheoil ar siúl in Óstán an Glenroyal i Má Nuad, ag tosú ag 8pm.

AÓF: Inis dom é seo, a Mháire: an bhfuil na ranganna dírithe ar dhaoine óga nó an bhfuil siad dírithe ar dhaoine fásta?

MUíF: Aon duine a thagann beidh míle fáilte roimhe.

AÓF: Bíonn cuid de do chlann féin ag seinm ceoil freisin, nach mbíonn? Cé mhéad atá sa chomhluadar ar fad?

MUíF: Bhuel, bhí ochtar ann ach an bheirt is óige a bhíonn ag seinm. Seinneann Róisín an bosca ceoil agus Úna an phíb uilleann. Casann siad na feadóga freisin agus déanann siad beagán amhránaíochta chomh maith céanna.

AÓF: Agus céard fút féin?

MUíF: Á, níl nóta agam, faraor géar!

AÓF: Tá tú i gCill Dara anois le fada nach bhfuil?

MUíF: Tá. Phós mé isteach san áit seo i 1969.

AÓF: Agus cérbh as duit ó thús?

MUíF: Gaillimheach mé, as Maigh Cuilinn.

AÓF: Agus an bhfuil mórán ceoltóirí maithe thart sa taobh sin tíre?

MUíF: Tá, anois. Ach nuair a bhí mise óg ní raibh. Ní raibh mórán ceoltóirí ann an t-am sin. Ach tá craobh láidir de Chomhaltas anois ann agus a lán ceoltóirí óga.

AÓF: Le filleadh ar ais chuig Ceardlann Earraigh, an bhfuil sibh ag súil le mórán daoine ag na ranganna?

MUíF: Bhuel, tá an rang bodhráin lán cheana féin!

AÓF: Agus bíonn sibh ag iarraidh ar dhaoine clárú roimh ré, nach mbíonn?

MUíF: Bíonn, ionas nach mbeidh na ranganna rómhór, an bhfuil a fhios agat, chun seans a thabhairt do chuile dhuine.

Chun clárú do na ranganna, nó ticéid a chur in áirithe don choirm cheoil, glaoigh ar:

Nóirín Ní Shúilleabháin: (01) 627-1559 Nuala Keane: (01) 627-3274 Máire Uí Fhlatharta: (01) 624-4512

Is amhránaí, ceoltóir, múinteoir agus fear spraoi é Antaine Ó Faracháin. Is as Baile Átha Cliath ó dhúchas é.