Is cuimhim liom nuair a bhí mé ar scoil bhí duine de na cailíní ag cur isteach ar an múinteoir. Ní chuimhin liom go díreach cén fáth. Thug an múinteoir idé bhéil di agus thug sí “noticebox” uirthi. Bhí mé sách óg agus chuaigh seo i bhfeidhm go mór orm toisc, ar an gcead dul síos, gur focal Béarla a bhí ann agus bhíomar i scoil lán-Ghaelach. Ach níos mó ná sin, tharraing an focal a leithéid de fhíseanna im’ intinn is beag nach bhfuair mise íde bhéil freisin leis an neamhaird a bhí á déanamh agam ar an gceacht a bhí idir lámha againn. Bosca agus clár fógra? Ag tarraingt airde uirthi féin, ach ag an am céanna, a bheith folamh? Bhí mearbhall amach is amach orm.

Rith an focal seo noticebox liom le déanaí is mé ag úsáid an ghréasán is nuaí ar an bhfód le tamall gairid anuas .i. Pinterest. Séard atá ann ná áit gur féidir íomhánna agus físeanna a tharraingt le chéile agus a roinnt ar “clár” cosúil le clár taghaid a bheadh ag dearthóir éadaí nó seomraí. Nó mar a dúirt an fuirseoir, Gillian Jacobs ar Twitter le déanaí: I think I may be wrong but from casual observation I have deduced that Pinterest is a website for women that love French Braids. Right?

Ligeann Pinterest don úsáideoir an t-ábhar is ansa leí nó leis a aicmiú agus a roinnt ar Pinterest féin agus a roinnt trasna líonraí eile cosúil le Facebook agus Twitter. Luadh sna meáin traidisiúnta anseo in Éirinn é le déanaí nuair a thug Irish Times Business cur síos ar “Pintervention” agus má tá na meáin traidisiúnta á chíoradh, tá pointe inchlaonta sroichte aige. (Féach an nasc de leataobh.)

Agus tá an pointe seo sroichte acu. De réir Internet Marketing Inc. taobh istigh de bhliain óna bhunú, bhí 10.4m úsáideoirí ar Pinterest. Taobh istigh de bhliain bhí 6m ag Facebook (2004 go 2005), bhí 3m ag Twitter (2007 go 2008) ach bhí 90m “úsáideoir” ag Google+. (Féach an nasc de leataobh.)

Liodán na mBuntáistí

Ach cén fáth go bhfuil an spéis as cuimse seo ann? Tá níos mó ná fáth amháin:

1. Tá sé éasca a úsáid. Tá sé soiléir: is féidir leat rud éigin a “repin” nó “like”. Tá dhá chnaipe agus, do pháistí Facebook, tá seo intuigthe gan stró. Má dhéantar “repin” ar rud is féidir é a chrochadh ar clár ar leith (Féach m.sh. an clár s’agamsa ar crochet - céard eile?! http://pinterest.com/enormous/crochet/

2. Is ‘suí siar’ é in ionad a bheith mar ‘cromadh chun tosaigh’, rud a ligeann don úsáideoir brabhsáil gan an iomarca tiomantais ach fós féin a bheith, fágaim, mar chuid de phobal daoine gur spéis leo cúirtíní áille. Nílim ag magadh. I ndáiríre píre, tá a leithéid ann: http://pinterest.com/possumandpearl/curtains-and-windows/

3. Tá sé bunaithe ar spéis in ionad a bheith bunaithe ar phobal. Bíonn duine rannpháirteach ann le spéis i rudaí ar leith agus mar sin is féidir páirt a ghlacadh ann gan chara ar bith ann. Cabhraíonn sé, ar ndóigh, má bhíonn cairde agat ann agus mar sin tá sé an-éasca teacht ar do chairde ar líne tríd Pinterest a cheangal le Facebook, Google/ Gmail nó Twitter.

4. Rugadh sa phóca é. Is é sin le rá ná gur rugadh é le suíomh soghluaiste agus le feidhmchláirín iPhone ann ón tús amach. Chomh maith leis seo, tá an suíomh sóisialta ón bun aníos le ceangal éasca le Twitter, Facebook agus Google mar a luaigh mé.

5. Dearadh ag a chroílár. Tá an ceann seo tábhachtach tharla go bhfuil sé bunaithe ar roinnt físeanna, go minic le naisc chuig eolas i bhfoirm téacs nó fiseáin. Mar gheall go bhfuil taithí úsáideora agus dearadh álainn ag an suíomh, bhí siad in ann iad siúd a bhí ag plé le íomhánna áille agus físiúla a mhealladh ar dtús.

6. Tá feidhm ghnó leis. Idir ghnólachtaí ag roinnt íomhánna de na tairgí atá ar fáil uathu nó ag cur cúpón ar fáil, tá fianaise ann gur fiú go mór é Pinterest dóibh siúd a bhfuil gnólachtaí nós maireachtála acu go háirithe; cuir i gcás an faisean, seodóireacht, dearadh srl. (feach m.sh. an tÉireannach Lorna Sixsmith http://pinterest.com/lorna_sixsmith/). Tá alt an-spéisiúil ar an ábhar seo scríofa ag The Nestor.com (féach an nasc de leataobh) a roinneann an-eolas faoin mbealach gur thiomáin Pinterest trácht agus, dá bharr, airgead chuig a ghnó. Tá roinnt grianghraf is fiseanna ó mo shuíomhanna féin curtha le Pinterest agam féin go bhfeicfidh mé an mbeidh Pinterest mar fhoinse tráchta domsa ach ag am scríofa an ailt seo, ní raibh. Tá ionadh orm mar gur cheap mé go raibh an spéis chéanna ag na pinnadóirí i gcroisé is atá agam féin...

Ach níl gach rud chomh sona sásta i ngairdíní Pinterest. Tá ceisteanna ardaithe ag blogadóirí is ag lucht úsáide Pinterest faoi cheisteanna cóipchirt. (Féach an nasc de leataobh) De réir a gcuid téarmaí agus coinníollacha, níor chóir d’aon úsáideoir íomhá a roinnt air gan chead an úinéir chóipcheart na híomhá. Tá Pinterest féin cosanta de bharr na téarmaí seo ó chás sárú an cóipchirt ach níl an t-úsáideoir. An dóigh leat go bhfuil corrlach ag Paddy Power faoi cé chomh luath is a bheidh cás trialach ar an gceist seo?