Buiséad: €2,500 go €12,500 (2003 go 2006)

An mhí seo táimid ag féachaint ar charr athláimhe atá an-choitianta – agus a bhfuil an-tóir uirthi. Sin an BMW 3 Series nó an E46. Chun an fhírinne a rá, tá an-chuid rudaí maithe le rá faoin gcarr seo agus is rogha mhaith í mar charr athláimhe. Ceann de na rudaí is fearr faoin BMW ná go bhfuil sí aitheanta mar ghluaisteán ar féidir brath uirthi, ach nuair a tharlaíonn fadhbanna leo (agus bíonn fadhbanna ag baint leo!), bíonn sé costasach na fadhbanna sin a réiteach i gceart.

Rinneadh an chéad E46 sa bhliain 1998 agus tháinig deireadh leis sa bhliain 2006. Bhí siad ar fáil le hinnill idir 1.8 agus 4 lítear (V8 32 comhla). Seo an ceathrú ghlúin den 3 series agus tagann sí tar éis an 3 series E36. Maith go leor, is leor an méid sin uimhreacha go fóill! Tá trí chineál E46 ar fáil – salún, coupé agus carr fada.

Tá an carr seo tarraingteach le féachaint uirthi, ach i gcomórtas leis an 5 series (E39), a bhí ar fáil go dtí 2003, níl sí leath chomh tarraingteach, dar liom. Ní hamháin go bhfuil an E46 níos deise ná carranna eile ón tréimhse agus ón aicme chéanna, ach tá sí níos spéisiúla le hais na gcarranna eile atá sa rannóg chéanna léi. Ó thaobh tiomána, tá an carr seo mín – agus, ag brath ar an gcineál innill atá faighte agat, tá sí cumhachtach chomh maith. Mholfainn féin gan aon rud níos lú ná dhá lítear (díosal) a fháil – agus gan aon cheann le níos lú ná sé shorcóir a cheannach. Tá E46 agam féin – le hineall 1.8 lítear – agus níl inti ach ceithre shorcóir. Agus cé nach dtiomáinimse róghasta, mothaím nach bhfuil cumhacht go leor cumhachta ar chor ar bith san inneall atá agam.

Is Mór an Ní an tSócúlacht

Tá an E46 sócúil mar charr agus, cé nach bhfuil aon rud róspeisialta ag baint leis an ucht eolais, is deas an rud a bheith á tiomáint. Chun tuilleadh sócúlachta a fháil sa charr seo, molaimse duit a chinntiú go bhfuil taca sciatháin lárnach inti. Tá neart slí sa salún chomh maith – agus go leor leor slí sa charr fada chomh maith. Chun an fhírinne a rá, bhí ionadh orm nuair a chonaic mé an méid spáis a bhí sa charr fada ach go háirithe.

Mar a mhaígh mé cheana, bíonn fadhbanna ag baint leis an E46, agus má tá tú féin ag smaoineamh ar cheann a cheannach, b’fhearr duit a bheith ar an eolas faoi na lochtanna a bhaineann léi. Is í an fhadhb is coitianta a bhaineann leis an E46 ná umar borrtha an radaitheora. Bailíonn an t-umar seo an fuarthán breise, nach dtéann tríd an radaitheoir, agus cuireann sé ar ais sa chóras é. An fhadhb atá ann ná nach bhfuil an t-umar féin in oiriúint don charr. Tá sé chomh simplí sin – agus, de thoradh caithimh agus cuimilte, pléascann an t-umar seo.

Ní hamháin go mbíonn fadhbanna ag baint leis an umar áirithe seo, ach bíonn fadhbanna ag baint le crochadh an chairr, le solas an mhála aeir agus leis an nglasáil lárnach chomh maith.

D’ainneoin na lochtanna thuasluaite, is maith liom an E46. Caithfidh mé a rá gur maith liom BMW i gcoitinne. Ach é sin ráite, is fiú smaoineamh ar na deacrachtaí seo sula gceannaíonn tú ceann. Is féidir na fadhbanna seo a sheachaint trí aire cheart a thabhairt do do charr – agus a bheith réidh le teacht roimh na fadhbanna.

I nDiaidh an tSoiscéil, an tAirgead!

Anois, má tá tú ag smaoineamh ar E46 a cheannach, seo chugat roinnt eolais faoina luach. Níl sa mhéid thíos ach meánphraghsanna. Molaim duit, ar ndóigh, stangaireacht a dhéanamh i gcónaí agus tú ag ceannach cairr. Braitheann na praghsanna seo ar an gcineál E46 atá de dhíth ort – salún, coupé, carr fada nó convertible – agus, ar ndóigh ar thomhas an inniill.

• Bliain Praghas
• 2006 €10,500-€12,500
• 2005 €6,000-€,9500
• 2004 €3,500-€8,500
• 2003 €2,500-€7,000

Má tá tú ag smaoineamh ar E46 a cheannach, molaim duit meicneoir a thabhairt leat mura bhfuil mórán eolais agat faoi ghluaisteáin. B’fhéidir go mbeidh tú in ann droch-chonradh a sheachaint má bhíonn saineolaí i do chuideachta!

Beimid ag féachaint an mhí seo chugainn ar charr nach maith liom go pearsanta, ach caithfidh mé a admháil gur carr í ar féidir brath uirthi; - beimid ag féachaint ar an Ford Fiesta! Go bhfóire Dia orainn!!