An Chomhairle Cheart

1. Ná téigh chuig an gharáiste, chuig an mhórdhíoltóir cairr go háirithe, roimh an TNG. Sábhálfaidh tú €80 gan dul ann. Íoctar a leithéid ar scrúdú i ngaráiste, gan aon bhall den charr a chóiriú ar chor ar bith chor ar bith! Coinnigh an t-airgead sin in do phóca.

2. Téigh faoin scrúdú TNG agus teip más teip atá tuillte ag an charr. Níl caillte agat ach €50 agus tá an tuairisc is fearr ar lochtanna do chairr anois agat.

3. Cóipeáil an tuairisc sin, TNG, agus sín chuig garáiste beag ionraic a bhfuil aithne agus meas agat orthu agus a bhfuil taithí ar obair an TNG acu. Fiafraigh díobh chomh maith faoin dóigh a bhfuil na boinn. Más gá, tiomáin thart chuig chomhlacht a dhíolas boinn. Ceannaigh a bhfuil de dhíth.

4. Tá do charr in innimh dul faoin athscrúdú anois. Ní bheidh le híoc agat ar a mhéid ach €28.

5. Tríd an mhórdhíoltóir a sheachaint, ag uimhreacha 1 agus 3, tá roinnt céadta €uro sábháilte agat agus níos tábhachtaí fós, ní contúirt do charr a thuilleadh duit féin ná do dhuine ar bith, go ceann tamaill eile.

Agus Comhairle Lúnasa:

1. Coimhéad thú féin ar an bhealach más ag casadh ar dheis a bheas tú féin nó an duine eile. Achan tír ar domhan a bhfuil tiomáint taobh ciotach an bhealaigh ina dhlí, is ceann de na fáthanna taismí báis is coitianta é sin. (A mhalairt atá fíor sna tíortha a bhfuil tiomáint ar thaobh na deasóige ina dhlí. Maraítear an-mhórán daoine sna tíortha sin nuair a bhíonn duine ag casadh ar chlé!)

2. Más ag scoitheadh a bheas tú féin nó an duine eile, bí iontach faicheallach. Is ceann de fáthanna móra eile a scuabtar daoine de dhroim an tsaoil é sin. Is é mo mheas nach dtuigeann daoine a dhonacht mar thiománaí atá an duine eile.

3. An té a scríobh an píosa seo, bhí sé in achar leathshoicind do bheith brúite isteach ar inneall a chairr féin ag tiománaí jíp ollmhór a bhí i mbun téacs gutháin a léamh ag 60 m.s.u. Ag fanacht agus ag comharthú le casadh ar dheis a bhí mé, gan aon bhosca tearmaplaisteach a bheith marcáilte ar an bhóthar. Bhí sé go léir le feiceáil sa scathán agam agus é trí charr siar uaim, go hard os a gcionn. Ní fhaca sé iad ag scinneadh isteach, do mo scoitheadh ar an taobh chlé. Anois níl aon charr idir mé agus an jíp ollmhór is é ag lascadh chugam ag 60 m.s.u. Ní hamháin go maróidh sé mise, ach tá sraith carranna ar mullach a chéile anoir im’ éadan atá ag déanamh 60 m.s.u. Is é sin, 60+60 = 120 m.s.u., rud a chiallaíonn go marófar tuairim is deichniúr duine nó mar sin, nó breis. Ní fheiceann fear ná bean ná páiste in aon cheann de na carranna anoir a bhfuil ag titim amach anseo agus mé ar tí bás a fháil brúite go fuilteach ar m’inneall féin!

Scaoilfidh mé an coscán láimhe le caolsheans éigin a theacht slán! Níor thug éinne eile faoi deara a raibh ar tí tarlú dóibh féin, ach beirt. An scríbhneoir seo agus an duine gustalach 30 rud éigin nó 40 bliana d’aois a bhí beagnach istigh ar mo chúl sular theilg sé uaidh an guthán agus dúirt lena chroí is lena anam “F.......!” Scinn sé tharam istigh agus chreath ruball a jíb ó thaobh go taobh ar an lána bhuí achar leathchéad slat sular smachtaigh sé arís í. Fós féin, níor chuir éinne eile faoi bhealach suntas ann.

Níor dúradh ar an nuacht Bhéarla an oíche sin, “Now for the good news. Fifteen people from five different families weren’t killed in a tragic pile-up at Dalys’ Cross this afternoon when everyone was returning home after the weekend. Only two of them saw it coming.”

Imigh in am, glac go réidh é agus bí go deas tuisceanach le gach éinne eile. Go soirbhí Dia daoibh agus ór don mhuintir a fuair bás ag an chrosaire sin. .