Roinnt míonna ó shin chonaic mé cuairteoirí a bhí ag fanacht san óstán i nGort an Choirce ag dul ar bord bus chuig teach ceoil Leo breis is deich míle ar shiúl de bharr nach raibh rud ar bith cultúrtha ag tarlú ar an sráidbhaile. Anois, agus Amharclann Uí Shearcaigh ar oscailt ó dheireadh mhí na Samhna, ní bheidh ar chuairteoirí nó ar mhuintir na háite an ceantar a fhágáil chun teacht ar a leithéid feasta.

Dúirt úinéirí na hamharclainne, Milo agus Eithne Butler, le Beo! go mbeidh an sráidbhaile ina iomláine ina lárionad teanga, cultúir agus sóisialta as seo amach. Tá an té a bhfuil an Amharclann nua tiomnaithe dó, an file áitiúil Cathal Ó Searcaigh, ag tabhairt treorach agus comhairle dóibh.

Beidh Francie agus Gearóid Ó Maonaigh ag seinm ann gach oíche Chéadaoin i rith mhí na Nollag agus beidh ceolchoirm ag Aoife Ní Fhearraigh i rith na míosa fosta. Tá oícheanta snagcheoil, ceol tíre, agus na goirmeachaí beartaithe do na seachtainí agus do na míonna atá amach romhainn.

Bíonn an-éileamh ar na rincí Salsa gach oíche Dhomhnaigh, nuair a thagann na sluaite isteach ó na bailte fearainn sa cheantar. Cuid mhaith acu is baintreacha agus daoine ina n-aonar iad nach dtaitníonn na tithe leanna leo agus a d’fhan sa bhaile roimhe seo.

“Tagann siad isteach, déanann siad damhsa, ólann siad cupa tae nó gloine fíona agus téann siad abhaile,” a deir Milo Butler.

Bhí ceardlann seiteanna ar siúl deireadh seachtaine na hoscailte agus tá sé i gceist ag muintir Butler pé cineál ceoil nó damhsa a bheas ag teastáil ó phobal na háite a chur ar fáil. Lena chois sin, beidh Cathal Ó Searcaigh ag cur clár cuimsitheach léamh filíochta i nGaeilge agus i mBéarla le chéile.

Beidh club scannánaíochta san amharclann fosta agus fáilte roimh léiritheoirí neamhspleácha toradh a saothair a phlé agus a thaispeáint.

Faoi láthair tá aos óg an pharóiste i mbun cleachtaidh do gheamaireacht na Nollag agus beidh Aisling Ghéar agus compántais eile drámaíochta ag teacht ar camchuairt go luath.

Tá scoil ealaíne sa cheantar agus beidh ranganna péintéireachta, déanamh uirlisí ceoil agus a leithéidí ar siúl i rith na bliana.

Tá siopa ceardaíochta san fhoirgneamh, áit a mbeidh deis ag daoine earraí cniotáilte áitiúla Errigal Knitwear agus earraí criostail a cheannach.

Fiontar nach mbeadh in iomaíocht

Nuair a chinn Milo, Eithne agus a seisear páistí ar bhogadh ó Bhaile Andarsan i mBéal Feirste go Gort an Choirce, shocraigh siad ar fhiontar a bhunú nach mbeadh in iomaíocht le gnólachtaí eile san áit. “Má bhíonn dráma á léiriú againn, beidh muid ag súil go mbeidh béile blasta ar ardchaighdeán ar fáil in Óstán Loch Altan, go mbeidh piontaí á n-ól i dTigh Bhillie ag an bhriseadh agus go mbeidh lóistín ar ardchaighdeán sna tithe lóistín áitiúla do na haisteoirí agus do na cuairteoirí. Dóibh siúd arbh fhearr leo gloine fíona agus pizza, beidh sin ar fáil i dTigh Mhaggie Dan,” a deir Milo.

I measc na n-imeachtaí agus na n-aíonna eile atá ag teacht go Gort an Choirce sna seachtainí agus míonna amach romhainn, tá an seó aonair “Catalpa” le Donall O’Keeffe agus dráma le Little John Nee. Beidh Joe Burke agus Anne Conroy ag seinm ceoil ansin agus tá Ronnie Drew ag beartú ar a theacht san earrach.

Níor lorg muintir Butler deontas ná cabhair airgid ó fhoinsí Stáit mar nach raibh siad ag iarraidh a bheith ceangailte le polasaithe teanga ná ceoil. “Má bhíonn grúpa aisteoirí ag iarraidh dráma i mBéarla a léiriú agus éileamh air, níl mé sásta go mbeadh coinníoll éigin ann ag cur coisc orainn sin a dhéanamh,” a deir Milo. É sin ráite tá siad féin agus fiontair mar iad in Inis Oírr agus sa Daingean i gContae Chiarraí ag lorg maoiniú le comhimeachtaí a eagrú agus turasanna a mhalartú. Cuirfear tús le “Turas na Gaeltachta” i Seanscoil Shailearna i gCois Fharraige, Contae na Gaillimhe i rith mhí na Nollag.

Is féidir le lucht foghlamtha na Gaeilge nó grúpaí eile na háiseanna in Amharclann Uí Shearcaigh a chur in áirithe ach glaoch ar Milo nó Eithne ag (074) 65630.

Is saoriseoir é Colm Ó Dúlacháin. Is as Baile Átha Cliath é ach tá sé ina chónaí i nGaoth Dobhair anois.