Is oth liom alt a thosnú le caint ar an gcúlú geilleagair ach níl aon ghabháil as go bhfuil tionchar as cuimse ag an gcúlú seo ar ghnólachtaí beaga, aireagóirí, cruthaitheoirí agus ar ealaíontóirí. Is iad na healaíona agus an t-imeall a fhulaingíonn le linn géarchéime. Iadsan atá ag cruthú seirbhísí idirlín is teicneolaíochtaí nua ar an imeall leis.

Ceann de na fáthanna a dteipeann orthu ná easpa infheistíochta ón rialtas, ó urraitheoirí, infheisteoirí agus ó na custaiméirí. Tá an-chaint ar ndóigh faoin easpa maoinithe agus creidmheasa óna bainc fud fad na hEorpa agus sna Stáit Aontaithe freisin.

Tá bealach eile leis an airgead seo a ardú le cúpla bliain anuas. Is é sin, trí shuíomhanna sluamhaoinithe. Séard atá i gceist leo siúd, ná suíomh inar féidir le healaíontóir nó le haireagóir cur síos a dhéanamh ar an togra atá idir láimhe aige agus ar a bhfuil ciste de dhith chun é a chur i gcrích. Chun é seo a dhéanamh iarrann an cruthaitheoir suimeanna áirithe airgid (ar scála de ghnáth) i dtreo sprioc airgid. Faigheann gach ball den slua aitheantas (ar scála leis) mar chomhartha bhuíochais as an gcabhair.

Scríobh mé cheana san alt seo faoi cé chomh tábhachtach is atá spriocanna: spriocanna sláinte agus spriocanna coigiltis. Úsáideann na suíomhanna seo spriocanna freisin: spriocanna ama agus maoinithe.

Neart Airgid le Bailiú

An ceann is cáiliúla is dócha ná www.kickstarter.com atá díríthe ar thograí ealaíne don chuid is mó ach tá cluichí ríomhaireachta ann, tograí faisean, bia agus damhsa. D’fhéadfá maidin agus neart airgid a chaitheamh ar thóir “warm, fuzzy feeling” ann.

D’fhógair Kickstarter ar an 21 Meitheamh go mbeadh siad ag roinnt eolais faoina staidreamh in am fíor as seo amach. Eolas fíorspéisiúl atá ann nuair a chuimhnítear nach raibh a leithéid de sheirbhís ann 5 bliana ó shin. Mar shampla, d’éirigh le seacht dtogra níos mó ná $1m a ardú ar an ardán seo. Is é an catagóir scánnain agus físe an catagóir is mó idir líon na dtograí agus líon airgead ardaithe ag $59.44m . Sin níos mó ná a cheathrú den $222m de na gealltáin ar thograí rathúla ag am a scríofa. Ach is é an damhsa an catagóir is rathúla le ráta ratha de 69.25%, beagnach aon trian níos fearr ná an ráta de 44% do na tograí ar fad.

Ar ndóigh, bhreathnaigh mé tríd go bhfeicfinn an raibh aon tograí le blas Gaelach ann. Tá neart bannaí is ceoltóirí ag iarraidh gealltáin a mheallú fá choinne taifid de cheol traidisiúnta, tá cúpla leabhar idir fhicsean agus thráchtas acadúla agus thogra amháin olla. Bhí cúpla togra a tharraing m’aird ach go háirthe. Ceann de na tograí Éireannacha is rathúla ann ná togra chun leabhar grianghrafadóra de radharcanna Éireannacha le Peter Cox a d’ardaigh $29,727 nuair nach raibh ach $11,000 de dhíth air! Comhghairdeas leis! http://kck.st/LtCG4C

Ar Son na Cúise

Ach ceann eile a tharraing m’aird ná ceann atá dírithe ar an nGaeilge féin. Tá Jonathan agus Amanda chun suíomh comhrá Gaeilge a chruthú chun cabhrú le daoine Gaeilge a fhoghlaim. An-smaoineamh, b’fhéidir nach bhfuil sé ró-úr mar smaoineamh ach tá sé uasal. Níl ach $5,000 de dhíth orthu chun an togra seo a chur i gcrích! Nuair a smaoiním ar na milliún a chuireann Foras na Gaeilge ar fáil d’eagraíochtaí Gaeilge gach bliain! Chun an togra a chur i gcrích, beidh an lánúin ag bogadh go Tír Chonaill ar feadh dhá mhí chun páirt a ghlacadh i gcúrsa Gaeilge agus máistreacht a aimsiú.

“Your generous support of this project will help fund the costs of the immersion program we must participate in this July and will help us get set up in Ireland to create the Comhrá le Chéile website and the online conversation system.”

A chairde, maith dom an chiniciúlacht, ach b’fhéidir gur chóir dom togra a bhunú chun airgead a bhailiú a ligfidh dom mo Ghaeilge bhreá líofa a thabhairt go daoine bochta gan Ghaeilge Theilinn! http://kck.st/MfJZeY Bhuel comghairdeas le Jonathan agus Amanda freisin – mar d’éirigh leo laistigh den am a bhí ceaptha acu (agus caithfidh mé a rá go raibh a gcur i láthair snasta 7 dea-bhéasach. Nasc ar leataobh).

Ach samhlaigh na féidearachtaí atá ann do thograí Gaeilge le feidhm cheart iontu? Samhlaigh na féidearachtaí atá ann do cláracha agus do scannáin Gaeilge, fílí agus d’amhránaí Gaeilge (Turas na bhFilí i gCeanada faoi dheireadh!) agus neart eile. Bhlais Fíbín, an comhlacht puipéid agus drámaíochta, cuid de na féidearachtaí nuair a chuir siad an togra Sétanta ar www.FundIt.ie, tionscnaimh sluamhaoinithe de chuid Business to Arts na hÉireann. D’éirigh leo níos mó ná €5,000 a ardú ar an suíomh iontach seo. Thug siad faoin a bhfeachtas le greann agus tuiscint ar a lucht maoinithe agus céard a thaitneodh leo. (http://www.fundit.ie/project/funders/stanta) Mholfainn d’aon eagraíocht Ghaeilge taighde a dhéanamh ar FundIt agus Kickstarter go bhfeicfear an bhfuil deis ann chun briseadh, fiú rud beag, ó bhrath ar an rialtas.

Tá FundIt ar an bhfód le bliain anois agus leathmhilliún euro ardaithe ann chun 143 tograí a mhaoiniú. In am an ghátair is éacht ar leith é sin! Tabhair bualadh bos daoibh féin, a mhuintir na hÉirinn!