"Nuair a bhuailtear an ghabhlóg thiúnta líontar an spás folamh thart timpeall air le creathanna beaga atá inláimhsithe ..." Denise Mc Shannon

Is meafar maith í an ghabhlóg thiúnta i gcomhthéacs shaothar agus shaol an ealaíontóra Denise McShannon. Is as Béal Feirste ó dhúchas í Denise ach tá sí lonnaithe i mBaile Átha Cliath anois, áit a gcaitheann sí a cuid ama sáite ina cuid péintéireachta agus ag obair le daoine óga ar thionscadal athnuachana i gcroílár na cathrach. Chaith mé lá léi ar na mallaibh le blas beag a fháil dá fealsúnacht, agus léargas éigin ar a saol agus ar a saothar. Tá an-éagsúlacht i gcúlra Denise. Nuair a chríochnaigh sí a céim sa phéintéireacht sa Camberwell College of Art i Londain chuaigh sí go Berlin, áit ar chaith sí cúig bliana ag obair mar ealaíontóir gníomhaíochta. Ar theacht ar ais go hÉirinn di, chaith sí roinnt ama ag obair i gContae Shligigh agus ar Oileán Acla. “Is mór an meas ar dhathanna agus ar thionchar an tsolais a thug an tréimhse sin domh; ach i mo chroí istigh is péintéir coirp mé agus nuair a tháinig mé ar ais go Baile Átha Cliath thosaigh mé ag déanamh ransú ar an chorp arís.” Tá fuinneamh agus feolmhaireacht le brath i noicht Denise agus rinne sí féin tagairt do shaothar Goya, Valesquez, agus do Rembrandt, agus don leas a bhaineann sí as a saothar. “Níl sé faiseanta an corp a léiriú ar bhealach traidisiúnta; tá claonadh láidir ann faoi láthair é a dhéanamh teibí. Tá suim agamsa an corp a thaispeáint ag gluaiseacht - cur síos a dhéanamh ar fhuinneamh agus an dóigh a dtéann sé sin i bhfeidhm ar an spás thart timpeall orainn. Tá meas agam ar an chorp agus, ag an am céanna, ba mhaith liom é a léiriú ar bhealach leochaileach.”

Athnuachan

I mí Dheireadh Fómhair thosaigh Denise ag obair leis an NCCAP (North Centre Community Action Project), grúpa a fhaigheann tacaíocht ó Choimisiún na bPáirceanna agus a bhfuil sé mar sprioc aige athnuachan a dhéanamh ar spásanna poiblí i dtuaisceart na cathrach. Tá cuid den cheantar seo go mór faoi míbhuntáiste ó thaobh fostaíochta agus áiseanna de, agus tá fadhb mhór drugaí le fáil ann. Bhí sé mar chuid den sprioc ag an ghrúpa seo daoine óga ón cheantar a mhealladh isteach chun a bheith ag obair ar thionscadal lena dtimpeallacht a dhéanamh níos deise agus dóchas a chruthú don todhchaí agus don ghlúin atá le teacht. In éineacht le beirt eile, Helen Laine agus Mary Kennedy, tharraing siad grúpa d’oibrithe FÁS le chéile agus thosaigh siad ag obair ar bhinsí poiblí a dhearadh agus a thógáil. Beidh siad seo suite i bpáirc áitiúil atá páirteach sa tionscadal athnuachana. “Is é an smaoineamh a bhí againn ná binsí poiblí a dhearadh agus iad a mhaisiú le mósáicí. Bhí muid ag iarraidh go mbeadh téama spreagúil agus dóchasach sa dearadh agus thóg sé tamaillín teacht ar théama a thaitin le hachan duine. Bhí cuid den ghrúpa ag iarraidh go mbeadh snáthaidí drugaí, etc. mar chuid den dearadh, mar go bhfuil na drugaí mar chomtharthaí lárnacha do go leor de na daoine óga seo. Sa deireadh thiar thall ghlac an grúpa le téama bunaithe ar na heilimintí - aer, uisce, talamh agus tine - agus thosaigh an obair láithreach ansin. “Bhí teorainn ama measartha teann againn ach, in ainneoin seo, beidh na binsí réidh le cur isteach sa pháirc in am don oscailt oifigiúil leis An Taoiseach Bertie Ahern an mhí seo. Chomh maith leis na binsí, beidh píosaí dealbhóireachta, gairdín luibheanna, agus lúbra ann, le cois rudaí eile.” D’admhaigh Denise go raibh sí dóchasach go ndéanfadh gníomhartha den chinéal seo difear sa todhchaí ach, go réadúil, ba é an phríomhaidhm a bhí ann ná muinín agus dearcadh dearfach a chothú i ndaoine óga atá faoi mhíbhuntáiste, macasamhail na ndaoine a bhí páirteach sa tionscadal. “Bíonn an-bhrú ar go leor acu cloí le dearcadh a gcairde agus gan a bheith difriúil, rud atá coitianta i measc daoine óga, dar ndóigh. Chonaic mé roinnt acu ag iarraidh na mbuanna iontacha a bhí acu a chur faoi cheilt mar nach raibh siad ag iarraidh seasamh amach,” a deir Denise. Nuair a thiocfaidh deireadh leis an tionscadal, luífidh Denise isteach arís ar a cuid péintéireachta féin ar bhonn lánaimseartha. “Faoi láthair tá mé ag tarraingt íomhánna éagsúla den chorp agus ag déanamh staidéir ar an spás a chruthaíonn na figiúir thart timpeall orthu féin. I gcuid de na pictiúir tá línte curtha isteach agam atá chóir a bheith cosúil le tírdhreach. Spreagann an caidreamh atá ag an chorp leis an spás timpeall air go mór mé.” Taispeánann Denise a saothar ar fud na tíre agus bhí an taispeántas deireanach aici sa Hallward Gallery, 65 Cearnóg Mhuirfean, Baile Átha Cliath 2 (01-662-1482/3). Tá na pictiúir ar díol ar phraghsanna éagsúla, ó €500 suas.

](mosaic1.asp) ](mosaic2.asp) ](mosaic3.asp) Na binsí atá á dtógáil i Fire Station Studios, Baile Átha Cliath

Tuilleadh eolais: denisemcshannon@hotmail.com

Is as Doire ó dhúchas í Ciara Nic Gabhann ach tá sí ina cónaí i mBaile Átha Cliath anois, áit a bhfuil sí ag obair mar mhúinteoir ealaíne.